Противпожарна заштита

Анекс ќе го гаси авиоскандалот

Македонија годинава, наместо три, најверојатно ќе купи само два противпожарни авиона бидејќи Владата нема пари да ги плати сите воздухоплови. Во тек се преговори со фирмата „Ер трактор“ од Шпанија за промена на договорот потпишан во март 2009 година, дознава „Дневник“. Договорот за купување на три авиони најверојатно ќе се измени со потпишување анекс-договор, со цел да се избегне ситуација во која една од страните би презела правни мерки против другата поради неисполнување на обврските. Во анексот би требало да стојат нови рокови, како и кога ќе бидат доставени и платени авионите. Со тоа нашата Влада би добила правна рамка да може да плати дел од парите годинава, а другиот дел во 2010 година.

Во Буџетот и со новиот ребаланс, кој се очекува кон крајот на месецов, нема да има средства за исплата на долгот од околу 8 милиони долари кон шпанската фирма, со што постои опасност зделката да пропадне. Токму затоа, во минатата недела на итен состанок во Македонија бил повикан Хуго Арцео, кој пред шест месеци, заедно со директорот на Дирекцијата за заштита и спасување, Шабан Салиу, ја склучи зделката вредна 10,3 милиони долари за набавка на три авиони „АТ 802А“.

- Ги откажав сите обврски што ги имав во Либија и веднаш дојдов на состанок во Владата со Салиу и со Ставрески. Им ги предложив нашите услови, а тие покажаа интерес да се заврши целата постапка - изјави за „Дневник“, Хуго Арцео.Арцео, Салиу и министерот за финансии Зоран Ставрески предложиле неколку начини како да се реши проблемот. Владата покажала голем интерес авионите да пристигнат годинава, но проблем биле парите. Иако немало дефинитивно решение, дознаваме дека постојат две варијанти како да се заврши зделката. Според првата, Владата годинава би платила за двата авиона што веќе неколку месеци се спремни за испорака, а третиот би пристигнал во 2010 година, кога Владата ќе даде пари за него.

Според втората варијанта, трите авиони би биле испорачани во септември годинава, а Владата би платила само два во 2009 година, а третиот да биде платен в година. Како и да е, паднаа во вода најавите на Владата дека годинава сезоната на пожари ќе ја пречекаме подготвени. Според првичниот договор, два од трите авиони требаше да пристигнат во јуни, а третиот во август. Целата процедура за набавка требаше да заврши најдоцна до 31 декември годинава, но бидејќи во буџетот нема доволно средства за исплата на останатите 80 отсто од парите, исполнувањето на обврските од договорот од страна на Владата било доведено во прашање. Во Буџетот за 2009 година немало одвоено средства за авионите, а ниту пак со првиот ребаланс.

Побаравме одговор од Салиу и од Ставрески во врска со преговорите со шпанската фирма и кое од предложените решенија ќе биде прифатено. Директорот Салиу, кој е на службено патување во Австрија, ни одговори дека преговорите се' уште траат. Одговорот на Ставрески исто така беше кус: „Набавката на авионите ќе се реализира“, рече тој.Арцео на Ставрески и на Салиу им објаснил дека трите авиони се веќе набавени и модифицирани според потребите на Македонија и дека не можат да бидат продадени на друга земја.

- Им објаснив дека набавката не може да се откаже за ниту еден од авионите и оти воздухопловите не може да бидат продадени на трето лице. Ги информирав Салиу и Ставрески дека двата авиона се подготвени за испорака во секое време, а третиот, кој во моментов има тест-летови, ќе биде подготвен за испорака во септември -објаснува претставникот на „Ер трактор“.

Александар Манасиевc

Наскоро ќе долетаат двата противпожарни авиона