Карпош ќе гради воден парк

Општината го донесе стратегискиот план за работа до 2013 година, во кој се предвидени повеќе мерки и проекти за подобрување на животот на граѓаните

Со воздушна бања на Водно, сплавови и ресторани на Кејот на Вардар и со ново туристичко биро ќе се развива туризмот во Карпош, со цел да се привлечат повеќе пари во буџетот. Градоначалникот Стевчо Јакимовски, во „Стратегискиот план 2009-2013“, чија цел е подобрување на животот на жителите, предвидува изградба на нова сала за венчавање, воден парк, надземни премини преку булеварот Партизански одреди и на улицата Теодосиј Гологанов.

Некои од овие проекти не може да се каже дека се нови, туку се преземени од минатите стратегиски планови. Надземните премини се стара и засега неуспешна приказна, додека матичната служба Јакимовски ја ветуваше и во својот прв мандат.

Освен овие цели, во стратегискиот план, кој беше усвоен на последната седница на Советот на Карпош, се опфатени и многу други сегменти како спорт и рекреација, комунални работи, урбанистичко планирање, култура, образование... Наведени се слабите страни во овие сектори, како и решенијата со кои би се надминале проблемите. Овој документ, се вели во заклучокот, може да се надградува, согласно со потребите.

- Главна цел на стратегискиот план е Карпош да стане општина со одржлив економски развој и со атмосфера погодна за водење бизнис - се вели во објаснувањето во документот.

Најголемиот економски бенефит Општината го очекува од инвеститорите, за кои се предвидува олеснување во областа на комуналните такси, но и од пренамената на земјоделското во градежно земјиште. За ова општинарите веќе поднеле барање при измената на Генералниот план на Скопје. Локалитетот Момин Поток ќе стане индустриска зона и се очекуваат нови вработувања.

За фекалната инфраструктура е наведено дека е несоодветно и лошо димензионирана. Општинарите ќе градат пречистителна станица за отпадни води и ќе ја обновуваат старата водоводна, атмосферска и фекална инфраструктура. Јавното зеленило ќе се полева од бунари по системот „капка по капка“.

Во документот е наведено дека за лицата со посебни потреби не постојат соодветни услови за нормално живеење. Затоа ќе се воведува звучна сигнализација и знаковен јазик, а ќе се оформи и сервисна служба за лицата со интелектуална попреченост, која ќе им дава поддршка на семејствата.

Во Карпош, во мандатот на Јакимовски, е предвидена изградба на ново основно училиште и нова детска градинка за опфатот Злокуќани, Бардовци и Нерези. Исто така ќе се уредуваат дворовите на постоечките градинки, ќе се менуваат азбестните покриви и ќе се оди кон се' поголема употреба на обновливи извори на енергија во училиштата. Во некои градинки ќе се воведе работење во две смени.

Голем акцент е ставен и на развојот на спортот во општината. Меѓу многуте содржини се предвидува и изградба на нов спортски објект во Злокуќани, терени за тенис, бадмингтон, кајакарска патека на Лепенец и Вардар, како и картинг-патека.