Вести

Гробиштата „Камник“ ќе се прошират и ќе добијат капела

Во интерес на граѓаните, Градот откупил парцела со површина од 4.550 квадратни метри

Снежана Калабакова

Гробиштата „Камник“ многу скоро ќе се прошират на нова парцела од половина хектар. Со тоа ќе се реши проблемот со нови гробни места, бидејќи на овие гробишта одамна немаше слободни места. Во АД „Бутел“ појаснуваат дека во интерес на потребите на граѓаните, особено на оние од општината Гази Баба, Градот ја откупил парцелата 838 со површина од 4.550 квадратни метри и веќе се планираат низа инфраструктурни зафати.

Ова е само првата фаза од проширувањето, а во наредната фаза проблемот со гробни места ќе се реши за наредните шест години, прогнозираат од Градските гробишта „Бутел“. Убедени се дека со овој потег на Градот почнуваат да се решаваат проблемите што се одамна наталожени, а за што немаа слух многу градски гарнитури. Тврдат дека веќе имаат јасни сигнали оти во иднина се планира да се реши и проширувањето на гробиштата во Ѓорче Петров и во Бутел, за што имале разбирање и поддршка и од општинските градоначалници. Наместо планираните 23 хектари за Бутел проширувањето ќе оди фазно и за почеток на парцела од 6 хектари. Во Ѓорче Петров, пак, ќе се изградат нови гробни места најпрвин на 3 хектари, а потоа уште на толку, со што ќе се реши проблемот за наредните 20 години.

Најнапред вниманието ќе се посвети на проширувањето на гробиштата во Камник, бидејќи иако тие со Законот за град Скопје во 2004 година се запишани како градски, одамна се запуштени. Нема струја, нема капела, нема продавница за погребна опрема, а на простор од 7 хектари со околу 4.000 гроба има само една чешма.

„За гробиштата ’Камник‘ најпрвин ќе договориме изработка на проект во кој ќе биде предвидена сета инфраструктура. Ќе биде планирана изградба на капели, трпезарија, продавница за погребна опрема и сето она што треба да го имаат едни градски гробишта. Општина Гази Баба веќе го асфалтираше патот до гробиштата, а ќе биде направена и ограда. Се надеваме дека во иднина ќе се прошират и гробиштата во Ѓорче Петров и во Бутел и дека Владата ќе одобри средства да се откупат парцели за проширување“, вели Илија Филиповски, генералниот директор во АД „Бутел“.

Од Одделението за односи со јавноста во Градот потврдуваат дека се работи на откуп на земјиштето за проширување на „Камник“, а во иднина и на Ѓорче Петров и Бутел, бидејќи проблемот со недостиг од гробни места станал акутен. Со одлука на Советот, цената за откуп на парцелите нема да биде повеќе од 20 евра за квадратен метар. Градот е во комуникација со Министерството за транспорт и врски и целокупната процедура за проширувањето на „Камник“ ќе биде завршена за петнаесетина дена.

Влезот во комплексот ќе биде од Старата железничка станица

Сања Наумовска


Огромен деловен комплекс, долг близу 1 километар, ќе никне на потегот зад Старата железничка станица. Во него се планирани комерцијални објекти и катни гаражи. За нивна изградба, неофицијално, е заинтересирана англиска корпорација, која се понудила да го направи и подземниот дел од Јужен булевар во строгиот центар на градот. Комплексот ќе биде поврзан со неколку сообраќајни и пешачки врски со Јужен булевар, кој ќе минува 6 метри под новиот објект.

И сообраќајницата и комплексот се предвидени со новиот Детален урбанистички план „Стара железничка станица“, кој деновиве е на разгледување пред јавноста. ДУП-от, кој го изработи „Тајфа план“, спаѓа во приоритетните планови и се очекува инвеститорот, веднаш по неговото донесување да започне со изградбата.

Во Министерството за транспорт потврдуваат дека планот е меѓу приоритетите на Владата, но велат дека го финансира Општина Центар. Од Општината, пак, одговараат дека не знаат кој ги дава парите за итната изработка на документот. Наводно, финансиер на приоритениот ДУП е инвеститорот, кому му се брза да почне да гради.

Странците што се заинтересирани за новиот комплекс, преку својот домашен претставник, фирмата „ГЕММА груп“, во февруари годинава имаат потпишано меморандум за соработка со Градот Скопје, по завршувањето на сообраќајницата таа да им припадне на градските власти. Од Градот Скопје тогаш информираа дека ГЕММА им понудила да го изгради подземниот дел од Јужен булевар, на потегот од раскрсницата со „Водњанска“ до подвозникот во Кисела Вода. За возврат, фирмата што ги гради хотелот и трговскиот центар и деловниот објект зад „Рамстор“, би требало да добие уште една градежна парцела на таа локација.

„Градот нема ништо против фирмата да го направи делот од Јужен булевар. Тоа им беше кажано и на претставниците на ГЕММА со кои потпишавме меморандум за соработка. Сепак, крајната реализација нема да зависи од Градот, со оглед на тоа дека се работи за државно земјиште“, информираа тогаш градските власти.

Од Министерството за транспорт, пак, тогаш одговориле дека за сите објекти што ги предвидува Деталниот урбанистички план ќе има организирано јавно наддавање. Деновиве Министерството информираше дека за посочената локација нема објавено тековна објава за јавно наддавање. Министерството за транспорт не доделува земја, туку неизградено државно земјиште отуѓува по пат на јавно наддавање.

Од „ГЕММА груп“ негираат дека имаат врска со изработката на Деталниот план и изградбата на комплексот. Според нив, тие се проектанти и изведувачи што ги ангажирале странските инвеститори само за објектите кои моментно и се градат на овој потег.

„Имаме договор за разработка на планска документација и изведба на објектите на хотелот, деловниот објект и трговскиот центар. Не сме информирани за новиот детален план, ниту, пак, што предвидува. Секако, какви објекти и да се планирани да се изградат, за тоа претходно Министерството ќе треба да организира лицитации“, вели Мето Стојчевски од ГЕММА. Тој го поздравува донесувањето на деталните планови со што, според него, полесно и побрзо ќе се донесат странски инвестиции.

Според новиот ДУП, влезот на новиот комплекс ќе биде Старата железничка станица, која инвеститорот има обврска целосно да ја обнови, според изгледот пред земјотресот. Комплексот ќе биде висок 16 метри и ќе има четири ката, односно приземје, два ката и потпокрив. Просториите наменети за комерцијални дејности ќе се изнајмуваат на странски брендови, а засега не се знае дали ќе има место и за домашни компании.

Објектот физички ќе се поврзе со новиот хотел, деловниот и со трговскиот центар кои моментно ги гради ГЕММА зад „Рамстор“, што значи дека посетителите на овие објекти нема да мора воопшто да излегуваат на отворено за да дојдат во новиот комплекс.

„Деталниот план предвидува повеќе маркички со комерцијална намена и две катни гаражи, кои веројатно ќе бидат поврзани во единствен комплекс. Под нив се наоѓа вкопаната делница од Јужен булевар која ќе се врзе со три ротонди со постојната сообраќајна мрежа. Планот се' уште е на јавна расправа, по што Градот Скопје и Министерството за транспорт ќе го дадат своето мислење, односно согласност. Откако ќе се усогласи со забелешките, ќе се најде на усвојување пред Советот на Општина Центар“, вели Лидија Андреевска од изработувачот, „Тајфа план“.

На двата краја на комплексот е планирана изградба на две катни гаражи кои ќе имаат капацитет за вкупно 1.400 возила. Катна гаража, според ДУП-от, има и на местото на привремените објекти, каде што сега е сместен маркетот на „Тинекс“. Таа гаража ќе биде висока 10 метри и делумно ќе биде вкопана во земја. Со трите гаражи ќе се обезбедат близу 3.000 паркинг-места, што според стандардите е задолжително за комплекс од оваа големина. Веднаш до третата катна гаража, на локацијата на Цветниот пазар, фирмата „Камфуд“ ќе го гради новиот затворен пазар со маркет и деловни простории.

Заради изведбата на целиот комплекс, покрај подземната улица, инвеститорот ќе изгради и три ротонди со кои постојната сообраќајна мрежа ќе се поврзе со новата сообраќајница и со објектот. Според сообраќајниот проект што го изработи „Зебра проект“, две помали кружни текови ќе се градат на местото на надвозникот што ќе се урива. Со едната ќе се врзат улиците „Мито Хаџи Василев - Јасмин“ и „Кочо Рацин“, а со другата „Железничка“ и „Бихаќска“. На другата страна на комплексот ќе се гради голема ротонда која ќе го регулира сообраќајот на раскрсницата на улиците „Јасмин“ и „Железничка“ со „Свети Климент Охридски“, „Водњанска“ и „Васил Ѓоргов“.

Подземната улица ќе биде широка 31,5 метри, од кои по две ленти од по 3,75 метри во двата правци, две ленти по 3 метри наменети за застанување на возилата, како и средиштен коридор во кој ќе се смести трамвајска пруга. Булеварот ќе биде транзитна брза сообраќајница за минување низ центарот, но ќе има сервисни излези што ќе го врзуваат со подземните гаражи, заради застанување во комплексот. На ниво на постојната сообраќајна мрежа, новиот објект ќе се поврзе со околните еднонасочни улици со неколку сервисни конекции. Планирано е улицата меѓу Музејот на Скопје и „Рамстор“ да се затвори за сообраќај во два правци и да се користи само како врска во правец на задниот паркинг на трговскиот центар.

„Постојната, но и планираната сообраќајна мрежа целосно ќе ги задоволат потребите и напливот на возила во комплекс од вакви размери. Особено, сообраќајот ќе се релаксира со изградбата на трите ротонди, на кои веројатно нема да има потреба од семафори. Улиците и понатаму ќе си останат еднонасочни, но ќе има доволен број конекции за минување во сите правци“, нагласуваат сообраќајните инженери од „Зебра проект“.