Македонска Филхармонија

Петнаесетгодишнината на дипломатските односи со Ватикан беше одбележана со гала-концертот на Благој Нацоски, а настанот беше искористен и за средба на министерката за култура на РМ со светски познатиот акустичар Јорг Кумел, кој работи на акустиката за новата сала на Македонската филхармонија

Нашиот познат оперски пејач и амбасадор на културата, Благој Нацоски, со завчерашниот концерт во Ватиканската палата ги одушеви присутните, а одбележувањето на 15-годишнината на дипломатските односи со Ватикан, беше искористено и за средба на министерката за култура Елизабета Канческа-Милевска, со светски познатиот акустичар Јорг Кумел.
-Кумел е човекот кој работи на проектот за акустиката за новата сала на Македонската филхармонија во Скопје. Салата чија изградба е во тек, треба да биде завршена во 2011 година. Канческа-Милевска и Кумел посетија и неколку репрезентативни зданија - концертни сали на чијашто акустика има работено Кумел, велат од Министерството за култура.

На одбележувањето на јубилејот во Ватикан, пак, во присуство на повеќе од 150 гости претставници на дипломатскиот кор, меѓу кои и триесетина амбасадори, се обратија Канческа-Милевска и монсињор Петер Брајан Велс од Државниот секретаријат при Светата столица.
-Во знак на добрата и пријателска соработка меѓу Република Македонија и Светата столица, преку културата и уметноста, како највозвишена мисија на човекот, повторно демонстрираме заедничка мирољубива политика, потврдуваме дека ги почитуваме сите култури и нации и дека придонесуваме во градењето на мирот, меѓусебната почит и соживотот, потенцирала Канческа-Милевска.

Од Министерството додаваат дека настанот е од исклучително значење за продлабочувањето на врските меѓу Република Македонија и Светата столица, која е голем поддржувач на нашата држава во сите интегративни процеси.

Инаку, програмата на концертот беше конципирана во соодветната симболика со настанот. Интернационалната академија - опера од Рим и Благој Нацоски изведоа духовна музика, а воедно и дела на Тодор Скаловски и на Трајко Прокопиев, чиишто 100-годишнини од раѓањето се навршуваат токму оваа година.

Реализацијата на овој концерт произлезе од иницијатива на средбата меѓу министерката Канческа-Милевска и претседателот на Советот за култура на Светата столица, Џанфранко Раваси во мај годинава.

http://vecer.com.mk/?ItemID=8D7B19CB4430E04194F3C8EC7434F548