Роза Петкова

Голем трговски центар со деловни простории, кино, хипермаркет, куглана, катна гаража ќе почне да се гради на зеленилото кај спортската сала „Партизан“. Земјиштето деновиве се оградува, а од Општина Карпош информираат дека инвеститор е „Мен фешн“, друштво за производство, трговија и за услуги од Скопје. Оттаму велат дека на локацијата ќе се градат и објекти за групно домување, во кои, според Правилникот за нормативи во урбанистичкото планирање, спаѓаат домови за студенти, стари лица, самци, деца без родители, но не прецизираат што точно од овие намени ќе се одбере. - Трговскиот ќе биде на приземје и со два ката на површина од 54.000 квадратни метри. Во него е предвидена голема катна гаража, куглана, четири киносали, фитнес-центри и огромен хипермаркет, продавници за брза храна и други содржини. Рокот за градба според Законот е не повеќе од шест години - велат од одделението за односи со јавноста на Општина Карпош. Тие на инвеститорот му издале само одобрение за локациски услови бидејќи засега тој ја немал комплетната документација за градежна дозвола. Во општината немаа информација за колку пари е откупено земјиштето, но велат дека парцелата имала и приватни сопственици. Според деталниот урбанистички план, целата слободна површина околу спортската сала, заградена со улиците Партизански одреди и Илинден од една страна, и улиците Љубљанска и Манапо од друга страна, е предвидена за деловно-станбен и спортски комплекс, наречен реонски центар Карпош 3. Тој содржи шест целини. Една од нив е трговскиот центар, чија висина на објектите е ограничена на 22,5 метри. Зградите за групно домување можат да бидат високи до 60 метри. Две парцели се за спорт на отворено и на затворено со фитнес-центри, базени и слично, кои не смеат да бидат повисоки од 22,5 метри. Од Општина велат дека заинтересирани инвеститори за изградбата на спортски терени и базен засега нема. Планот предвидува и изградба на црква на аголот меѓу Партизанска и Љубљанска. Овој проект беше актуелен во периодот кога в.д. градоначалник на Општината беше Сашо Димиќ. Таа требаше да се гради на 400 квадратни метри и според проектот да има мал плоштад, подземен паркинг, сала за крштевка, трпезарија и по надворешноста да личи на „Света Софија“ од Охрид. За изградбата на црквата од Општината сега не кажуваат ништо. - Неоградениот дел од зеленилото е парцелата, каде и според ГУП и според ДУП е предвидено да се гради црква - е кусиот одговор што го добивме од одделението за односи со јавноста. Деталниот план дозволува и доградба на постоечката сала „Партизан“, пробивање на неколку сервисни улици и паркинг пред салата.