Булеварите само на хартија, а за возење по нив ќе почекаме

Во градскиот буџет се предвидени 20 милиони денари за проектирање нови сообраќајници

Сања Наумовска


Проширување на дел од улиците во булевари, изградба на нови мостови на Вардар, на денивелирани сообраќајници, нови кружни текови и други сообраќајни решенија, се дел од проектите што ги нарача Градот Скопје. Станува збор за булевари во речиси сите делови од градот каде што има застои и проблеми во сообраќајот. Засега се завршени осум идејни проекти за проширување и изградба на нови сообраќајници. Во буџетот за годинава се предвидени 20 милиони денари за проектирање нови сообраќајници.

„Проектирањето на ’Првомајска’, која со реализацијата ќе реши многу проблеми на делницата кон Драчево, е веќе започнато. Се проектира проширувањето на делот до улицата ’Народни херои’ и натаму кон населбата Драчево, од ’Србија’ до мостот кон Маркова Река“, информираат од Градот.

Булеварот АСНОМ, според новиот проект, ќе продолжува од салата МЗТ преку мостот на Вардар кон Скопски саем. Ќе ја пресече населбата Керамидница, каде што е предвидена голема раскрсница со уште еден нов булевар „16 Македонска бригада“ за да се спои со „Гоце Делчев“. Булеварот „16 Македонска бригада“, пак, започнува од населбата Железара кон булеварот АСНОМ. Проектот предвидува денивелирано решение за оваа сообраќајница што ќе поминува над „Александар Македонски“. Кај зградата на Противпожарната бригада во Автокоманда и пред стадионот во Гази Баба, како и пред влезот на Железара ќе има кружни текови.

„Започнато е проектирањето на улица ’Есенинова’, која треба да ги спои ’Трета македонска бригада’ и ’Првомајска’ зад Тутунскиот комбинат и ќе поминува покрај пругата. Улицата ’Индустриска’, пак, од булеварот ’Војводина’ преку Керамидница и зад универзитетот ФОН ќе се поврзе со АСНОМ“, информираат од Градот.

Ќе се проширува и „Трета македонска бригада“ на потегот од улицата „Пролет“ до „Србија“, а „Христијан Тодоровски - Карпош“ ќе продолжи од Општината Чаир кон обиколницата. Ќе се проширува и врската меѓу „Партизанска“ и „Илинденска“, односно улицата „Никола Парапунов“ во Карпош 4. Во тек е и изработката на проектите за „Илинденска“, од Владата до фонтаната во Градски парк и од „8 Септември“ до улицата „Ацо Шопов“.

Според очекувањата на градските власти, сите решенија што веќе се предвидени во Генералниот урбанистички план ќе го растоварат сообраќајот на повеќе локации во градот. Сепак, додека не се изработат изведбените проекти, со кои ќе се одговорат прашањата за финансиската конструкција и евентуалните имотно-правни спорови на трасите на овие сообраќајници, засега е неизвесно кои, кога и дали ќе се реализираат. Во Градот велат дека е добро решенијата што ги предвидува ГУП да бидат испроектирани за во иднина реализацијата да биде полесна и побрза. Трендот на проектирање ќе продолжи и годинава, а некои од проектите што се најавуваат подолго време треба да почнат и да се реализираат.

http://utrinski.com.mk/?ItemID=6759C478AAC06E4C9C562AC207714DBE

Ќе ескалира ли сообраќајниот метеж со увозот на стари автомобили?

Неизграденоста на примарната мрежа е главната причина за сообраќајниот колапс

Снежана Калабакова



Идејата да се дозволи увоз на возила постари од десет и повеќе години ја наметна дилемата кај скопјани околу тоа дали градските сообраќајници имаат капацитет да го примат новиот бран возила. Граѓаните очекуваат зголемен број автомобили што ќе се движат по улиците, бидејќи на сегашните би им се придружиле и новодонесените, па се скептични околу тоа дали протокот по градските сообраќајници воопшто ќе биде возможен. Тие стравуваат дека Скопје ќе се дозадуши во сообраќаен хаос, бидејќи и сега има долги колони возила, па тешко се стигнува од еден крај на градот до друг. Скопјани се убедени дека по очекуваниот увоз, улиците комплетно ќе се блокираат, зашто оние што немаат возило ќе купат, а тие што имаат по едно можеби ќе купат уште едно. Се прашуваат каде ќе се возат толку многу автомобили кога одамна не е изградена ниту една нова сообраќајница, ниту пак, се прави нешто за да се реши сообраќајниот хаос во градот.

Некои сообраќајни експерти со свои анализи и процени сметаат дека во Скопје сега има над 180 илјади регистрирани автомобили, а се возат и многу нерегистрирани. Дел од нив се стари по 20, 30 и повеќе години. Се' уште по скопските улици може да се види по некое „ами 8“, кое сигурно е возено четири децении, потоа „фиќо“ и други возила на „Застава“, што е општа слика, пак, на сиромаштијата. Освен тоа, во режим на движење на тие стари возила нивните еуро 0 мотори испуштаат огромни количества штетни издувни материи.

Сепак, одредени експерти сметаат дека со увозот на половни возила сообраќајниот калабалак по скопските улици нема да стане поголем одошто е сега. Нивното тврдење е дека таквата состојба е резултат на неизграденоста на примарната сообраќајната мрежа, која е реализирана само 30 проценти од она што е предвидено со Генералниот урбанистички план. Сообраќајна изграденост со таков обем не може да прими толкав капацитет на возила, и тука е главниот проблем.

„Неизграденоста на примарната мрежа е, пред се', главната причина за сообраќајниот метеж во Скопје. А примарна мрежа се магистралните и собирните улици. Поради тоа голем дел од сообраќајот се префрла на секундарната мрежа, која пак, ја чинат сервисните и станбените улици. Тие не се димензионирани за толкав обем на возила. Затоа сметам дека самиот увоз нема да ја влоши состојбата повеќе отколку што е моментно. Исто така, метежот е последица и на лошата регулација на сообраќајот и нереализираните мали интервенции на некои делови од сообраќајниците кои значително би го зголемиле пропустот на возила, како на пример ’засекување‘ на островцата од Сајмиште во правец на Судска палата, со што ќе се добијат три ленти и поголем проток“, вели Стефан Калајџиев, сообраќаен инженер од проектантското биро „Зебра проект“, кој смета дека Градот Скопје годишно за сообраќајот треба да издвојува по 50 милиони евра за да може да се надмине ваквата состојба.

Според статистиките на МВР, во 2009 година во Скопје биле регистрирани 104.008 возила. Сообраќајната полиција при СВР - Скопје во текот на ланската година поднела 1.984 прекршочни пријави за необновена регистрација на автомобилот. Казната за оние што не го сториле тоа во рок од 30 дена по истекот на регистрацијата изнесува 100 евра, додека за над 30 дена е 500 евра. За такви нерегистрирани возила, за кои газдите треба да платат глоба од 500 евра, биле поднесени вкупно 368 прекршочни пријави.

Сообраќајниците на две нивоа засега се само цртежи

Во 2010 година градот планира да направи идејни решенија за клучки на четири локации, а потоа ќе се утврдува дали нивната изградба би била оправдана и исплатлива