Куманово

ВОЈНИК ЖИВЕЕ СО ЛЕГЕНДАТА ЗА КАРПОШ

Кулата на бегот чека на споменикот

ГОРДИ СЕ ЖИТЕЛИТЕ НА ВОЈНИК ЗАТОА ШТО КАРПОШ Е РОДЕН ТУКА. А УШТЕ ПОВЕЌЕ ЌЕ БИДАТ ГОРДИ, АКО СЕ РЕАЛИЗИРА ИДЕЈАТА НА МНОГУМИНА ДА СЕ ИЗГРАДИ СПОМЕНИК НА КАРПОШ КАЈ ВИСОЧИНАТА ДО САМИОТ ПАТ ВО НИВАТА КАДЕ ШТО БИЛА КУЛАТА НА БЕГОТ, КАКО ТРАЕН БЕЛЕГ НА ЧОВЕКОТ КОЈ СО СВОЈАТА ХРАБРОСТ И ПОЖРТВУВАНОСТ СТАНАЛ ЛЕГЕНДА КОЈА ЌЕ ЖИВЕЕ ВЕЧНО

...

КРАЛОТ ОД КУМАНОВО

Еве што за ова, покрај другото, се вели во хрониката на Мехмед Рашид - Ефенди ( 1668 - 1721 ): ,, ...Бидејќи меѓу неверничката раја и немуслиманските австриски проклетници постоеше таен сојуз, од ден на ден се зголемуваа нивните зулуми и напади врз некои села и градови. Во последните неколку години се појавил некој проклетник, наречен Карпош, раководејќи со ајдутски разбојници се прогласил за крал на Куманово и на негово барање царот на Австрија му испратил калпак. Околу него биле насобрани голем број ајдутски одметници и многу раја неверници. Тој и неговите придружници се забарикадирале во паланката Егридере ( Крива Паланка ) која се наоѓаше во негови раце. Тој бил забарикадиран во некој манастир кој личел на некоја паланка, а потоа и во Куманово околу кого имало ископан ров и поставена ограда. Покрај тоа што се претставувал како крал на Куманово и се населил во овие места, се чуло дека тој имал и извесен број приврзаници во Качаничката Клисура... Неговата екселенција, високопочитуваниот хан на Крим, Селим Гирај-хан сераскерот Махмуд-паша, везирите и ајаните, кои се наоѓаа во царската армија, одржаа консултативен состанок и едногласно, што е потребно за ваква состојба, решија дека е неопходно да пристигне и да се нафрли врз неверниците... Кога Карпош дозна дека муслиманските сили се наоѓаат во близина неговите засолништа, тој заедно со сите проклетници кои се наоѓаа под негово знаме го промени своето решение и се даде во бегство. Прво замина во Куманово и се смести во соѕиданата паланка на овој град. Утредента и благородните муслимански сили тргнаа од долната страна на Егридере и пристигнаа до кумановската тврдина. Проклетиот неверник стапи во борба, но бидејќи кај неверниците по кратко време не остана сила за продолжување на борбата, благодарение на севишниот бог, гореспоменатиот проклетник по име Карпош, заедно со неговите многубројни невернички приврзаници беше заробен... Проклетникот Карпош, кој беше фатен во кумановската паланка, беше доведен во Скопје каде што беше набиен на кол покрај скопскиот мост и така неговата кобна душа беше предадена на пеколот. Потоа татарските смели и победоносни војници го оставија голото тело на Карпош, симболот на заблудата, да служи како знак на победата на нивната сила... Пристигна и друг хатихмајун со кој се наредуваше високопочитуваниот хан, екселенцијата Селим Гирај-хан заедно со румелиските сили, арнаутските борци, татарските воени сили и другите муслимански војници да вложат труд и напор со божја помош да се одмазди на непријателите на исламот во тие подрачја и потоа да го посети Одрим... Горди се жителите на Војник затоа што Карпош е роден таму. А уште повеќе ќе бидат горди, ако се реализира идејата на многумина да се изгради споменик на Карпош кај височината до самиот пат во нивата каде што била кулата на бегот, како траен белег на човекот кој со својата храброст и пожртвуваност станал легенда која ќе живее вечно.

Вечер - Томо Чалоски - 05.09.2006