НЛБ Тутунска банка

Во Скопје се раѓа деловно-банкарски центар

Во рамките на овој „сити центар“ се гради и модерна катна гаража за 500 возила

Деспина Трајковска

Скопје полека, но сигурно го добива својот нов деловен центар во централното градско јадро. На растојание од нецел километар, веќе се сконцентрирани голем трговски центар, факултет, седиштето на Европската унија, се гради комплексот на НЛБ Тутунска банка, а наскоро се очекува на едно место, во поранешната зграда на НИП-от да се преселат голем дел од буџетарите и централата на ИК банка. Во непосредна близина на „Рамстор“ пак, наскоро треба да се постават темелите на уште еден деловен објект и ексклузивен хотел.

Сите овие субјекти меѓусебно одвоени со мали растојанија ги исцртуваат контурите на „сити центар“ на Скопје, сличен на оние во европските метрополи. Современата нишка на комплексот дефинитивно ќе ја „влече“ првата катна гаража во градов, која се гради како дел од банкарскиот комплекс на НЛБ Тутунска банка. Таа ќе треба да ги задоволи потребите за паркирање. Паркирањето е еден од главните проблеми во центарот на градот, па со изградбата на катната гаража тој проблем треба да се намали.

Инвеститорите на гаражата, која практично претставува дел од проектот за деловниот објект на НЛБ Тутунска банка, се убедени дека таа ќе претставува полн погодок за центарот на Скопје. Посочуваат дека гаражата ќе има капацитет за паркирање за околу 500 возила, а банката, за своите потреби, ќе има сопствен подземен паркинг.

Ајдован Адемовски, сопственик на фирмата „Сити плаза“, која е делумен инвеститор на катната гаража и деловниот објект, вели дека комплексот треба да биде комплетно завршен најдоцна до септември. Според проектот, и двата објекта имаат приземје и пет ката. Катната гаража ќе биде една од најсовремените во регионов и ќе има осум нивоа за паркирање, ако се има предвид дека покрај приземјето и петте ката, објектот има и две нивоа за паркирање под земја. Единствено во тој дел возилата ќе се паркираат преку рампа-систем, додека на катовите ќе се искачуваат со товарен лифт.

„Овој современ принцип на паркирање ќе го спроведуваат специјално вработени лица, односно, возачите само ќе го остават клучот од возилото, а се' друго ќе биде наша работа. Оваа услуга воопшто нема да значи дека паркирањето ќе биде прескапо, ќе чини приближно колку и услугата што се нуди на блиските јавни паркинзи“, вели Адемовски.

Предвидено е приод до катната гаража да има од кај „Рамстор“, односно од насока на Јужниот булевар, додека за излезот од гаражата треба да се одлучи деновиве. Карактеристично за катната гаража, што не е случај со другите во регионов, е тоа што објектот ќе биде целосно затворен, а можност за паркирање ќе има и на покривниот дел од објектот. „Единствено тоа ќе остава впечаток дека станува збор за катна гаража и тоа доколку се гледа од некој повисок објект“, посочува Адемовски.

Тој категорично ги отфрла шпекулациите дека наместо катна гаража таму се гради хотел. Увид во досегашните градежни активности неделава направи и Градежната инспекција од Општина Центар. Инспекторите велат дека работите на терен се изведуваат според предвиденото и додаваат дека „засега, секоја шајка е на место предвидено со проектот врз основа на кој е издадена дозволата за градба на катна гаража и деловен објект“.

http://www.utrinski.com.mk/?ItemID=3403FAE272380549B04EC17BCDB2EEE9