Музејски комплекс „Македонска Борба“

Првите 40 восочни фигури стигнаа во Скопје, а носат облека креирана од сестрата на творецот на програмата во музејскиот комплекс и директор на Архивот на Македонија

09:30 | 09.04.2010 | Автор: Климентина Илиевски

Сестрата на творецот на програмата на музеите на ВМРО и на жртвите на комунизмот и директор на Архивот на Македонија, Зоран Тодоровски, ги креира костимите на восочните фигури, кои ќе бидат изложени во музејскиот комплекс, дознава „Шпиц“.
Првите 40 пристигнаа деновиве во Скопје, комплетно готови, во креации на Зорица Тодорова-Младеновиќ. Меѓу нив се Јане Сандански, Гоце Делчев, Никола Карев, Ѓорче Петров, Крсте Петков-Мисирков и Методија Андонов-Ченто.
Тодорова-Младеновиќ не сакаше ништо да открие во врска со костимите зашто секоја нејзина изјава можела да се исполитизира.
- Јас сум моден креатор, костимограф. Каде ќе ме ангажираат, таму ќе работам - рече Тодорова-Младеновиќ.
И Зоран Тодоровски прво не сакаше да зборува, со образложение дека е рано да се откриваат детали за костимите, но кога го прашавме за ангажманот на неговата сестра, образложи дека таа била најкомпетентна за оваа работа зашто специјалност и биле костимите од периодот на револуционерната борба.
- Што да правам кога сестра ми е најдобра? Сестра ми е првата што направи модна ревија во Скопје, а е и првата која дипломирала костимографија и сценографија во Париз - рече Тодоровски.
Костимографот го одбрала фирмата „Специјална опрема“, која беше избрана на тендерот за изработка на восочните фигури. Директорот Јовица Ѓуричиќ рече дека се мислеле меѓу две костимографки, а одлучиле да ја ангажираат Тодорова-Младеновиќ поради тоа што другата жена била во пензија. Вели дека кога се договориле со неа, не знаеле дека таа е сестра на Зоран Тодоров, а кога подоцна дознале, не сакале да ја сменат одлуката зашто биле задоволни од нејзината работа.
- Ова е стручна работа во која не сакаме да мешаме политика. Тодорова-Младеновиќ има големо искуство зад себе и е голем професионалец - рече Ѓуричиќ.
Претседателот на Антикорупциската комисија, Илми Селами, пак, нагласи дека овој случај ќе биде разгледан и до вторник ќе се произнесат дали има некакво прекршување.
- Можеби изборот случајно паднал на неа, а можеби и не. Комисијата ќе провери и на кој начин „Специјална опрема“ ја ангажирала Тодорова-Младеновиќ. Ќе испитаме дали во тендерот е дозволено фирмата да ангажира подизведувачи - рече Селами.
Тодорова-Младеновиќ е професорка на Факултетот за ликовна уметност во Скопје по предметот модно креирање. Ангажирана е како костимограф во претстави на режисерот Коле Ангеловски - „Жена ми се вика Борис“, „Јане Задрогаз“ и „Евнух“, а и во неколку македонски филмови. Била костимограф во последниот филм на Милчо Манчевски „Како бебе“, чија премиера се очекува до средината на годинава, а и на „Прашина“.
Музеите на ВМРО и на жртвите на комунизмот ќе се простираат на 2.500 квадратни метри, а ќе бидат поставени 105 фигури. За првите 40 беа потрошени 27 милиони денари. Рокот за останатите 65 восочни фигури е до крајот на 2011 година и тие ќе чинат уште 69 милиони денари.