Градежните работи на надвозникот на булеварот Крсте Мисирков, кај Бит-Пазар ќе продолжат, откако ќе се најде соодветно решение за пронајдениот дел од каналот на реката Серава. Каналот го открија минатата недела екипите на фабриката „Карпош“, при поставувањето на третиот столб од натпатникот

Каналот на реката Серава, последна пречка за изградбата на натпатникот

Конзерваторскиот центар потврди дека ископаните ѕидини не се споменик на културата

Снежана Калабакова



Градбата на која наидоа вработените од фабриката „Карпош“ при зафатите на надземниот пешачки премин на Бит-пазар не претставува споменик на културата. Станува збор за спроводни канали на реката Серава, која некогаш минувала токму во тој дел. Конзерваторскиот центар Скопје и ЈП „Водовод и канализација“ веќе дадоа согласност градежните зафати на натпатникот на Бит-пазар да продолжат. Од општина Чаир велат дека ова се можеби последните пречки од разни инсталации на кои наидоа градежниците при изведувањето на работите за изградбата на првите столбови од преминот. Токму поради тоа некои од нив се премостуваа, а најголем проблем имаше со високонапонските кабли. Тие се наоѓаа над главниот цевковод фи 250, а имаше проблем и со цевките од топлификационата мрежа. Ваквите непредвидени пречки од подземни инсталации придонесоа да се изгуби време и да се доцни со реализацијата на проектот. Откако работниците наидоа на непозната градба, повторно извесен период градежните зафати беа стопирани. Штом се потврди дека станува збор за спроводни канали на Серава, работите продолжија. Реката во минатото го делела Скопје на два дела. Нејзините пет извори се наоѓаат на југозападниот дел на падините на Скопска Црна Гора од каде што реката со своето течение се спушта до градот. Минувајќи низ Чаир некогаш течела низ делот каде што сега се наоѓа Старата скопска чаршија кон Театарот на народностите, па по сегашната улица „Серава“. Реката го снабдувала стариот град со вода, а токму на Бит-пазар, каде што се гради натпатникот, беа пронајдени дел од нејзините спроводни канали.

Инвестицијата за надземниот премин, кој треба да ја замени пешачката зона кон зелениот пазар и обратно, изнесува 11 милиони денари. На местото на сегашниот пешачки премин ќе бидат изградени жардиниери.

„Од општина Чаир уредно не' повикаа да го провериме она што го најдоа градежниците при копањето на темелите за крајните столбови на пешачкиот премин. Утврдивме дека станува збор за спроводни канали на реката Серава, која некогаш го снабдувала градот со вода. Нејзините подземни води денеска се причина за влагата и за поткопувањето на темелите на Даут-пашиниот амам“, вели Емилија Петрова, директорка на Конзерваторскиот центар на Скопје.

Изет Меџити, градоначалник на Чаир, објаснува дека тоа што нема подземен катастар за Скопје, како и вообичено, и сега при изведбата на градежните работи за надвозникот на Бит-пазар предизвика проблеми.

„Бидејќи не знаевме што беше ископаното побаравме мислење од Конзерваторскиот центар на Скопје и тие потврдија дека станува збор за спроводни канали низ кои некогаш минувала реката Серава. И ЈП ’Водовод и канализација‘ ни дадоа согласност дека работите може да продолжат и се надевам дека за еден и пол месец надземниот премин ќе биде готов. Монтажните делови за горниот дел се завршени и само ќе треба да се монтираат“, објасни Меџити.