Нуклеарна електрана?

Бугарите не' сакаат за „Белене“, ние не сме размислувале

„Стандарт“ деновиве пишуваше дека Македонија ја разгледува можноста за учество во бугарската нуклеарна централа

Нина Нинеска-Фиданоска

Притиснати од економската криза и од немањето пари да ги завршат почнатите енергетски проекти, Бугарите би сакале и Македонија да ја видат како еден од инвеститорите во својата нуклеарка „Белене“, чија изградба во моментов е прекината, токму поради неможноста да се затвори финансиската конструкција за овој скап проект.

Но, владини извори во Македонија тврдат дека досега на Влада немало ниту расправа ниту каква било одлука, за Македонија да се приклучи кон тој проект.

Бугарскиот весник „Стандарт“ деновиве пишуваше дека Македонија ја разгледува можноста за учество во изградбата на бугарската нуклеарна централа „Белене“, која моментно е во застој поради недостиг од финансии. Весникот, повикувајќи се на извори во владата и во парламентот во Софија, наведува дека евентуалната позитивна одлука на Скопје да се вклучи во проектот ќе помогне во обезбедувањето средства за доизградба на централата.

Бугарскиот премиер Бојко Борисов изјави дека и Србија покажала интерес за пет проценти од акциите, што, според него, ќе го направи „Белене“ балкански и европски проект. Владата на Бугарија призна дека не успеала да ја убеди Романија да се вклучи во проектот откако главниот инвеститор, германската енергетска компанија РВЕ, се повлече минатата есен. Изградбата на централата привремено е прекината и интензивно се бараат нови инвеститори.

„Белене“, која е лоцирана на Дунав, 180 километри североисточно од Софија, почна да ја гради руската компанија „Атомстројекспорт“, а вредноста на проектот беше проценета на четири милијарди евра. Првиот реактор требаше да биде изграден до септември годинава.

Кризата и недостигот од финансиски средства ја принуди Софија да ги забави, па дури и да ги запре големите енергетски проекти. Премиерот Борисов неодамна соопшти дека Бугарија би можела целосно да се откаже од нафтоводот Бургас - Алексадрополис и да ја суспендира изградбата на „Белене“, за потоа да се повлече и да каже дека Софија се' уште не донела дефинитивна одлука за судбината на двата проекта.

Како и да е, во Македонија досега немало посериозни размислувања за вклучување во овој проект. „На седниците на Владата досега не се зборувало за таа опција“, велат владини извори.

Нашите соговорници претпоставуваат дека можеби за бугарската нуклеарка се заинтересирал и некој приватен инвеститор од земјава, но и таа алтернатива е речиси неможна.

Инаку, познато е дека во енергетската стратегија за земјава, која ја подготви МАНУ, во делот за нуклеарна енергија, како една од можните алтернативи е спомната и изградба на нуклеарна централа во Македонија. „Но, знаеме дека тоа е многу сложен, долгорочен проект, чиј старт би требало да се подготвува повеќе години, а потребно е да се обезбедат и голем број меѓународни документи и да се усогласи со многу конвенции. Станува збор за голема инвестиција, па затоа тоа е само идеја, а досега не е донесена одлука да се почне со таков проект“, велат нашите извори во Владата.