Надземни и подземни пешачки премини

Мислам дека се работи за нешто вакво 

Даниела Трајковска


Иако во декември минатата година официјално беа поставени темелите на пешачкиот мост на Бит-пазар, речиси цела година преминот не им е достапен на граѓаните. И покрај тоа што надвозникот сега е изграден и на него веќе се поставуваат билборди, граѓаните викендов не можеа да ја минат сообраќајницата на најфреквентното место, под изградениот мост. Од една страна, поранешниот пешачки премин на булеварот Крсте Петков-Мисирков, кој се наоѓа веднаш под надземниот премин, веќе не функционира и е затворен со жардиниери, а од друга страна, пак, на скалите на мостот беше забранет пристапот, со тоа што дел од луѓето што работеа таму ги одвраќаа сите граѓани, кои сакаа прописно да ја минат улицата. Скопјани револтирани поради ова, велат дека не е фер да се затвори пешачкиот премин пред да се дозволи преминување преку пешачкиот мост. - Бев во саботата на Бит-пазар. Имаше голем метеж затоа што за викенд сите купуваат за зимници. Другите премини се пооддалечени за минување. Едниот е долу кај „26 Јули“, а другиот е во близина на поликлиниката „Бит-пазар“. Младите можат да пешачат, но не и постарите. Многумина беа натоварени со производи за зимница, а преминот кој сите најмногу го користат и кој води до паркиралиштата беше затворен. Луѓето, сакале или не, мораа да прескокнуваат преку жардиниерите на средината на булеварот - тврди Аница К., која викендов пазарела таму. Според портпаролот на Општина Чаир, Авни Кавала, работниците, најверојатно, работеле нешто, па затоа преминувањето на граѓаните им било забрането. - На мостот сега ќе се почне со работење на покривот. Лифтовите се прават, така што во најскоро време ќе биде пуштен во употреба - вели Кавала. Тој не одговори зошто е затворен и пешачкиот премин на толку фреквентно место, кога надземниот премин уште не е официјално во функција. Арбен Речица, надзорниот за реализацијата на работите на мостот, потврди дека преминот бил затворен бидејќи на него се работи. Инаку, според Речица, граѓаните имаат и други пешачки премини на кои можат да минуваат, а кои не се толку далеку. - Нормално е дека мостот ќе биде затворен кога на него се уште се работи. Кога ќе се заврши со работата на него, ќе биде отворен за сите граѓани - изјави Речица. Од Град Скопје, пак, велат дека тие ги поставуваат жардиниерите на оваа локација. - По барање на Општина Чаир, за зголемување на безбедноста на пешаците на овој потег ги поставуваме жардиниерите - изјавија оттаму. Според информациите што ги добивме од нив, сега е затворен еден премин, меѓутоа, како ќе пристигнуваат барањата од Општината, истите ќе се разгледаат, па така ќе се затвораат и другите премини. Дали додека да се заврши мостот ќе се затворат сите премини, не се знае, меѓутоа, најверојатно, доколку надлежните продолжат вака, додека надвозникот не се заврши за да може да се преминува преку него, граѓаните ќе треба да „прелетуваат“ преку булеварот.