Блокади на железничкиот сообраќај

Незадоволни од владините мерки за штедење минатата недела штрајкуваа и вработените во метрото и во градскиот автобуски превоз во грчкиот главен град. Вработените во атинскиот јавен превоз се незадоволни и од рестриктивните планови на Владата за решавање на проблемите во овој сектор кој со години работи со загуби.

Нови протести против предвидената либерализација на товарниот транспорт денеска започнаа и сопствениците на камиони и цистерни во Грција.

Стотици товарни возила се упатгија кон Атина, со намера да им ги предадат клучевите од превозните средства на органите на државната администрација. Демонстрантите сепак се согласија да не го блокираат градскиот сообраќај и своите возила да ги паркираат на места одредени од полицијата.

Претседателот на Сегрчката федерација на меѓународните превозници Апостолос Кенанидис изјави дека организацијата бара отфрлање на нацрт-законот за либерализација на транспортниот сектор.

Владата на премиерот Јоргос Папандреу соопшти дека е решена целосно да го отвори секторот на товарните превози за конкуренцијата за три години. Грчкиот министер за инфраструктура и транспорт Димитрис Репас минатата недела изјави дека нема да го прифати барањето на превозниците за воведување на 10-годишен преоден период до целосна либерализација во издавањето лиценци за товарен превози.

Мерките за либерализација на секторот се во рамките на планот за финансиско заздравување на земјата.