Телеком арена (арена Филип II Македонски)

Игор Чавески

Владата врши силен притисок кај градежната фирма „Бетон“, која ја гради арената „Филип Втори Македонски“, да ги заврши источната и западната трибина до Велигден, за кога е планирано премиерот Никола Груевски свечено да го пушти, предизборно, во употреба реновираниот стадион, дознава „Време“. Нашите информации ги потврдува и рекламата што се врти на јавниот сервис, дека стадионот ќе биде пуштен на 24 април и дека сето тоа е по заслуга на Владата, со напомена дека го исполнила тоа што го ветила.
Власта сака пред почетокот на изборната кампања, која ќе почне кон средината на мај, да покаже дека изградила што поголем број капитални објекти, за каков што се смета националната арена, па затоа по секоја цена инсистира сите градежни работи да бидат завршени во периодот кој најдобро може да се искористи за предизборен маркетинг. И покрај укажувањето на првите луѓе од „Бетон“ дека времето е премногу кратко и дека е најдобро отворањето да биде наесен, како и што првично било планирано, од Владата не сакале да чујат за таквата можност.
Шпекулациите одат дотаму што се говори дека на стадионот ВМРО-ДПМНЕ би можела да го организира завршниот митинг од изборната кампања затоа што плоштадот „Македонија“ е претворен во градилиште поради изградбата на спомениците од „Скопје 2014“.
Покрај желбата на Владата отворањето на стадионот да биде пред почетокот на изборната кампања, оттаму сакаат сето тоа да биде изведено на спектакуларен начин, со фудбалски натпревар или со концерт, за целата церемонија да не се сведе само на обично сечење ленти. Се обратиле до Фудбалската федерација на Македонија (ФФМ) за таа да обезбеди атрактивен противник, од рангот на Шпанија, но оттаму стигнал одговор дека тоа едноставно не е можно. Како причина од ФФМ го навеле фактот дека преговорите за да се донесе силна репрезентација, каква што е Аргентина, Бразил или, пак, Италија, траат и по неколку години и дека, згора на тоа, 24 април не е термин одреден од ФИФА за организирање пријателски натпревари.
Сепак, од Владата не се откажуваат од намерата стадионот „Филип Втори“ да биде отворен со спектакл и дека, најверојатно, во соработка со домашни продуцентски куќи ќе се обидат на концерт во Скопје да донесат светско музичко име.
Поради страв дека со тоа темпо на работа „Бетон“ нема да го стигне рокот што и е даден од Владата, фирмата-изведувач ангажирала дополнителен број работници за да работат преку ноќ, со пуштени рефлектори. Во моментов се поставуваат столчињата и инсталацијата, а за крај е оставено да се уредува просторот под трибините.
Националната арена „Филип Втори Македонски“ почна да се реновира во 2008 година кога Јавното претпријатие за стопанисување со станбен и деловен простор склучи договор со „Бетон“ вреден 50 милиони евра. Договорот предвидуваше реновирање на јужната трибина, изградба на нова северна, источна и на западна трибина, атлетска патека, како и поставување рефлектори. Засега се завршени само јужната и северната трибина.
Слично сценарио власта приреди и во август 2009 година кога се пушташе северната трибина. И тогаш Владата го брзаше „Бетон“ што поскоро да заврши со реконструкција на трибината, со тоа што тогаш целта не беа изборите, туку пријателскиот натпревар меѓу фудбалските репрезентации на Македонија и на Шпанија. Поради инсистирањето на Груевски и неговите министри во поудобен амбиент да го гледаат натпреварот, работниците на „Бетон“ работеа на температура повисока од 40 Целзиусови степени, а еден од нив го загуби и животот паѓајќи од скеле.
Националниот стадион не е единствениот објект која Владата планира да го пушти во предизборието. Следната недела Груевски ќе ја отвори новата зграда на Клиниката за гинекологија во Клиничкиот центар. Кон крајот на мај, во екот на кампањата, ќе биде пуштен Музејот на ВМРО, како прв објект во проектот „Скопје 2014“.