СО ЗАДОЦНУВАЊЕ ОД ПОЛОВИНА ГОДИНА

Жичарницата до Крстот готова во мај

Од Министерството за транспорт и врски велат дека го пробиле рокот оти ја промениле динамика на плаќање поради светската економска криза

Скопјани до врвот на Водно со жичарницата ќе се возат кон крајот на мај. Првичниот рок кој го даде премиерот Никола Груевски дека на Нова година жичарницата ќе биде готова е пробиен, оти надлежните немале пари навреме да ги исплатат изведувачите.
"Промената на првично предвидениот рок е поради променетата динамика на плаќање, која беше изменета поради светската економска криза. Но сега работите се одвиваат според предвидената динамика и се очекува до 25 мај жичарницата да биде готова", велат од Министерството за транспорт и врски, кои ја водат постапката.
Од Министерството информираат дека се поставени темели на сите десет столбови, на нив е поставена линиската опрема, бетониран е просторот на почетната и на крајната станица и монтирана е опремата на гаражната хала, која се наоѓа на Средно Водно. Во наредните два месеца треба треба да се постави опремата на почетната и на крајната станица. Портокаловите гондола уште не се стасани, но, според најавите на надлежните, треба да стигнат месецов, и веднаш ќе се монтираат.
Жичарницата од Средно Водно до Милениумскиот крст ќе биде долга два километра. Граѓаните ќе се возат во затворени гондоли, во бело -портокалова боја, со слика од македонското знаме во долниот дел. Двете ВИП гондола ќе бидат црвени, со капацитет за четири патници, што е двојно помалку од обичните . Жичарницата ќе има можност за пренос на 1.200 патници за еден час. Ја гради австриската фирма "Допелмаер", чини 6,7 милиони евра, а со неа ќе стопанисува ЈСП "Скопје".
(А.А.)