Скопски сообраќај (општо)

„Јасмин“ го откочи метежот

Централното градско подрачје цел месец беше во сообраќаен хаос, поради градежните активности на улицата кај „Рамстор“, но и таа кај МАНУ. Токму поради тоа Градот ги забрза градежните активности

Речиси сите улици во централното подрачје, вчераутро, беа блокирани поради реконструкцијата на „Мито Хаџи Василев-Јасмин“, која трае веќе еден месец. Напладне, притисокот од возила се намали, бидејќи улицата беше пуштена за возење. Таа е готова, информираше градоначалникот Коце Трајановски на настанот за почеток на санацијата на оградата на мостот „Гоце Делчев“. Градежните активности на оваа важна сообраќајница, кои требаше да се одвиваат два месеца, се забрзаа и завршија за еден месец, рекоа надлежните. Реконструкцијата создаваше метеж не само кај Зелениот пазар, кај Собранието и кај ГТЦ, туку и во цело централно подрачје. Проодноста беше отежната не само поради реконструкцијата на „Јасмин“, туку и поради градежниот зафат на коловозот и оградата на мостот кај МАНУ. Активностите почнаа во декември минатата година, а беше најавено дека ќе траат до мај.

- По „Јасмин“ веќе се вози. Наредните три дена останува да се асфалтираат малите споредни улички - изјави портпаролот Неделчо Крстевски.

Појасни дека градежните работи на мостот „Гоце Делчев“ нема да значат затворање на сообраќајна лента. Во првата фаза, рече тој, ќе биде санирана само оградата, без да се интервенира на коловозот.

Дел од граѓаните сметаат дека е добро што улиците се санираат, но децидни се дека градската власт требало поубаво да ги осмисли градежните активности.

- „Јасмин“ е една од најфреквентните улици во градот. И пред делумно да се затвори за собраќај, таа секојдневно беше блокирана, камоли сега - вели Самоил М. од населба Центар.

Портпаролот Крстевски на прашањето зошто се одлучиле да „отворат“ две градилишта на ист потег, кај „Рамстор“ и кај МАНУ, објасни дека градската власт немала друг начин. Нивниот Сектор за сообраќај, им сугерирал прво да ја завршат „Јасмин“, а потоа да почнат со реконструкцијата на други улици во центарот.

- Експерти од нашето одделение сметаа дека ова е најдобриот начин. Откако ќе почне обновата на другите улици во централното подрачје, „Јасмин“ е таа која ќе го собере целиот сообраќај од нив. Воедно препораката од нив беше дека не е препорачливо одреден период да се почнат активности само на една улица, туку во исто време на неколку. Поинаку, ќе беа затворени на далеку подолг период - изјави портпаролот.

На прашањето зошто сега почна ваква акција за обнова на улици и булевари, а не во летниот период, кога градот и сообраќајот на улиците се порелаксирани, од Градот изјавија дека сега температурите се поповолни. Објаснија дека на постудено време, и асфалтот се лади побрзо. Доколку би се нанел асфалт на пример на 40 степени, и улицата би била затворена на далеку поголем период отколку месец дена, како што беше „Јасмин“. А тоа не е препорачливо, според нив, за улици во центар, каде што има и најголем метеж.

Привремен режим на „Партизанска“ и кај „Холидеј ин“

Од денеска почнуваат градежни активности и санација на булевар Партизански одреди и улицата Васил Аџиларски, која поминува покрај хотелот „Холидеј ин“. Ќе се реконструира дел од „Партизанска“, од Рузвелтова до „Тифани“ и улицата Аџиларски, од Градска болница до Народната библиотека. Во наредниот период ќе се отпочнат активности и на уште неколку улици во централното градско подрачје - на „Димитрија Чуповски“ кај трговскиот центар „Палома бјанка“. Потоа, како што најавија властите, некаде во јуни, ќе почне реконструкцијата на „Климент Охридски“.

За годинава градоначалникот Коце Трајановски најави и проширување на „Теодосиј Гологанов“, по теркот на булевар како „Илинденска“, како и изградба на кружен тек кај Католичка црква.

За деновиве, по една година реконструкција, е најавено и отворањето на новопроширениот булевар Србија. Од Градот апелираат до граѓаните за разбирање.

Јорданка Ивановска
Анела Петрова

АНКЕТА: ГРАЃАНИТЕ ЗА РЕКОНСТРУКЦИЈАТА НА СКОПСКИТЕ УЛИЦИ

Жарко Ристевски:

Требало да се гради на лето

- Сообраќајниот хаос не е само сега кога се санираат улици, мостови и тротоари. Доволно е да дојде некој странски државник или функционер, па да се блокира сообраќајот. Кога се работи на реконструкција на улици, тоа треба да се прави кога фреквенцијата на сообраќајот е помала, пример налето.

Љубинко Живковиќ:

Да се тргнат таксистите спроти ТЦ „Рамстор“

- И порано, особено во центарот не можеше да се помине. Беше страшно. Знам бидејќи живеам во кулите токму спроти ТЦ „Рамстор“. Сега откако се направи „Јасмин“, се надевам ќе биде подобро. Но, само доколку таксистите не одземаат дел од коловозот и несовесно се паркираат по тротоарите. Тоа треба да се реши.

Сашо Јовановски:

Санациите се добри, но улиците се претесни

- Добро е што се прават улиците бидејќи се катастрофа. Ги уништивме возилата од дупки, а како таксист постојано кружам низ градот. Нормално е да има метеж кога се изведуваат вакви градежни зафати. За поздравување е обновата на „Васил Ѓоргов“, „Јасмин“, мостот кај МАНУ, но улиците се претесни.

Љупчо Овнарски:

Со нови улици се зголемува проточноста

Сметам дека требаше да се обноват сообраќајниците, особено „Мито Хаџивасилев-Јасмин“, која е фреквентна. Доколку не се направеше, ќе се создадеше уште поголем метеж. Сега се поминува многу побрзо бидејќи нема дупки.