build.mk » Forum: Мостови (општо)

Можеби ке стават бекатонки ,сигурно нешто се планира ваљда нема така да го оставаат,имаше уште едно попаметно решение тие светилките да ги тргнеа од сред пешачка патека да ги поставеа на кошот од мостот,има и др варијанти ,убаво изгледа од надвор се надевам ке го средат и внатре, и ке ги корегират тие грешки.

"Најлошиот град од градовите е тој што нема ред,мир и сигурност за своите граѓани" (Али ибн Еби Талиб)

Груевски ќе ја позлати оградата на мостот кај МАНУ

Премиерот инсистирал да се пребои со златна боја оградата која со идејното решение беше предвидена да биде црна

Деспина Трајковска

Премиерот Никола Груевски од неодамна покажува афинитети и кон архитектурата. Смета дека оградата на мостот кај МАНУ наместо црна, треба да биде златеста. Таква ќе била полична и подобро би се вклопила во целиот амбиент од „Скопје 2014“.

Дознаваме дека идејата му се родила пред десетина дена, ноќта кога со градоначалникот Коце Трајановски беше во обиколка на улиците што се санираат и притоа помина за на самото место да се увери како тече обновата на Мостот на револуцијата. Желбата уште веднаш му ја пренел на Трајановски и го задолжил да изнајде начин таа да биде исполнета. Тој, пак, веројатно воден од мотото наредено - сторено, како што дознаваме, сторил се' замислата на премиерот експресно да му биде пренесена на младиот автор на новата ограда, Зоран Јордановски. Нашите извори велат дека надлежните градски власти во изминатите денови неколкупати инсистирале тој да изврши корекција во идејното решение и конкретно, црната боја на оградата да ја замени со златеста, обидувајќи се да го убедат дека златната боја нема да отстапува од неговата првична замисла. Младиот автор, кој веќе извесен период е во Фиренца, се нашол во небрано. Како што се зборува, тој се обидел да им објасни дека таквиот концепт нема да соодветствува со целокупното идејно решение ниту, пак, дека тој како автор на делото смета дека златестата ограда би била посоодветна.

Градоначалникот Коце Трајановски категорично ги отфрли нашите сознанија. Тврди дека никој не побарал промена на бојата на оградата и ниту тој ниту премиерот не се обиделе да стапат во контакт со авторот Јордановски за евентуално да му сугерираат што било во врска со идејното решение. Но, истовремено, градоначалникот не знаеше да ни одговори дали оградата ќе биде црна, каква што е сега и како што, впрочем, изгледа на приказите во идејното решение што го достави Градот до медиумите дента кога започна со зафати за обнова на мостот.

„Не знам каква боја ќе биде оградата, треба да погледнам, па да ви кажам“, накусо рече Трајановски со доза на нервоза, но видливо изненаден од нашето прашање. Истовремено не' прекори да не го мешаме премиерот со секоја улица и шахта, иако тој самиот во изминатиот период покажува голем интерес за градските проекти и сака на самото место да се увери како тече нивната реализација. Се појавува на асфалтирање улици, шета по реконструирани мостови, паркови, тезги...

Инаку, за да се исполни желбата на премиерот би требало да се случи преседан, да се смени решението во пет до 12, или во крајна линија, Градот да распише нов конкурс за реконструкција на мостот. Во него, за да се исполнат желбите на Груевски, би требало да се инсистира идејните решенија да понудат исклучиво златна боја на оградата. Сепак, вчера официјално од Град Скопје потврдија дека оградата на мостот ќе биде златна, иако во идејното решение таа е црна.

„Идејните решенија претставуваат појдовна архитектонско-урбанистичка основа за правење изведбени решенија. При изработката на основното решение, сепак, е решено бојата на оградата да биде нијанса од жолта. Значи, решението за бојата е донесено врз основа на естетското совпаѓање на бојата на оградата со илуминацијата, која ќе биде поставена на целосно реконструираниот мост“, одговорија вчера градските власти.

Засега е неизвесно дали авторот на идејното решение за обнова на заштитната ограда и илуминација на Мостот на револуцијата ќе присуствува на свеченоста која се очекува да се случи наскоро. Според неодамнешните информации од неговиот татко, Зоран веќе извесен период е во Фиренца каде што работи како практикант во една компанија. Таткото не' информираше дека ангажманот на мостот е втор голем проект на неговиот син кусо време по магистрирањето. Прв му бил проектот за објектот на Музејот на ВМРО. Токму од хонорарот што го добил за идејното решение за овој објект, младиот архитект си овозможил да се дообразува надвор од државава.

Јордановски: Сменета е бојата на оградата

Авторот на идејното решение за оградата и за илуминацијата на мостот, Зоран Јордановски, вчера ни потврди дека проектот претрпел корекции. Настанале промени во бојата на оградата, која од неговата замисла да биде црна - сега се префарбала во златеста. Но, тој не информира кој е „виновникот“ за корекциите. Како што вели, „кој точно е нарачател на некоја измена може само да е предмет на шпекулација“.

„Да, има промени во бојата на оградата, меѓутоа не би рекол дека тоа е нешто чудно по процес на креативна работа. Всушност, од идејното решение кое се избира на конкурс, секогаш има некакви измени на крајното решение во голема или во помала мера. Тоа е регулирано со договорот што го потпишува авторот и се обврзува да работи на измени и корекции на идејата, по сугестија на инвеститорот. Кој точно е нарачателот на некоја измена можеме само да шпекулираме“, вели Јордановски.

Тој објаснува дека го понудил проектот во неколку варијанти на боја и до неодамна преовладувало мислењето дека оградата треба да остане црна. „Најверојатно, сега кога конструкцијата е готова, се појавиле различни мислења. Побараа и мое мислење, па предложив да се направат тестови со неколку бои и да се избере која варијанта е најдобра. Една од варијантите беше ’изгазена‘ златна боја, која очигледно остана како последна“, дообјаснува авторот. (Дс.Т.)

http://www.utrinski.com.mk/?ItemID=933D310C2F583B49A6F92F430E97B0E1