Блокади на железничкиот сообраќај

ЗАПРЕН ТРАНСПОРТОТ КОН ПРИСТАНИШТЕТО ВО СОЛУН

Дури510товарни вагони на „Македонски железници“ веќе шест дена се заглавени во земјава поради штрајкот на грчките железничари

Грците ги блокираат македонските товарни вагони, а пуштаат српски. Раководството на грчката железница вчера дозволи влез за три српски вагони со шеќер, чие крајно одредиште е градот Лариса, додека 510 товарни вагони на „Македонски железници“ веќе шест дена се заглавени во земјава поради штрајкот на грчките железничари.  Грците ни најавија дека ќе ги примат овие вагони на своја територија и поради тоа треба да им овозможиме транзит низ Македонија - изјави Благоја Крстевски, директор на „Македонски железници-транспорт“.Ова не е првпат годинава железничкиот транспорт кон Грција да биде блокиран. Според Крстевски, од 132 работни дена годинава, 74 дена имало застој во товарниот сообраќај на железницата поради блокада од грчка страна. Финансиската штета може да се мери со стотина илјади евра. Во просек дневно превезуваме по два милиона нето-тонски километри, а последниве денови паднавме на само 300.000. Со Грците никогаш не се знае. Некогаш штрајкуваат железничарите, пристанишните работници или камионџиите. Постојано имаат оправдување, а штетите паѓаат на наш товар - вели тој.Во следните денови се очекува да заглави и камионскиот транспорт поради најавените штрајкови на работниците од пристаништата во Солун и во Пиреја.

ШТЕТАТА ЗА МАКЕДОНИЈА

На македонска територија се заглавени и стотина вагони на австриската и на српската железница, а трошоците ги плаќа нашата железница. Минатонеделниот состанок во „Македонски железници“ со грчките и со српските колеги резултира само со најава дека возовите ќе почнат да сообраќаат кон грчките пристаништа. МЖ ја извести Европската асоцијација на железници за прекинот на сообраќајот.Во македонските фирми ги пресметуваат загубите од неколкудневниот застој во транспортот. Челичарницата „Макстил“ е еден од најголемите корисници на железничкиот транспорт, со годишен превоз на 600.000 тони. Поради блокадата, во складиштата им стојат околу 25.000 тони лимови, кои треба да се превезат до солунското пристаниште. Уште 170 вагони со 5.300 тони лимови стојат натоварени на македонските пруги. Во солунското пристаниште за товарање чекаат 10.000 тони челични слапови. Во пат-позиција сме. Наместо да се намалуваат количините, постојано се трупаат нови. Вообичаено, четири дена се потребни за товарање еден вагон, превоз и за истовар во Солун. Сега вагоните стојат по 10 дена на македонска територија - изјави Јане Адамчевски, раководител за транспорт во „Макстил“.

АЛТЕРНАТИВЕН ПАТ

Тој вели дека мора долгорочно да се најдат алтернативни пристаништа за македонските фирми.Сега не можеме да извезуваме преку други пристаништа. Тие веќе си имаат договорени зделки, па бараат повисока цена или треба да чекаме предолго - истакнува Адамчевски.Според Илија Гечев, сопственик на „ИГМ Трејд“, пристаништето во Солун е тесно грло за Македонија. Мора да се има алтернативни патишта кон Бургас и кон Драч. Ние најчесто користиме камионски превоз, но поради честите блокади на грчките пристаништата секој транспорт е поскап. Сега чекаме нова технолошка опрема од САД, а има најава за нов штрајк во Солун и во Пиреја поради приватизацијата на грчките пристаништа. Тоа е голема пречка - вели Гечев.