Хотел на Плоштад Македонија (5.1)

Не еден, туку два седумкатни хотела ќе се градат на плоштад!

Се бара идејно решение за хотел со пет ѕвезди, дел од комплексот Градска куќа

Деспина Трајковска

Не еден, туку два хотела ќе се градат на скопскиот плоштад! И двата објекта се предвидени со контроверзниот Детален урбанистички план „Мал ринг“, кој дозволува тие да бидат високи до 29 метри, односно да имаат по седум ката. Објектите е предвидено да се градат од левата страна на плоштадот, гледано кон Камениот мост, едниот во зеленилото спроти кафулето „Тренд“, а другиот пред зградата на „Пошта“ како дел од комплексот Градска куќа. Додека јавноста е во исчекување до каде е постапката за изградба на хотелот спроти „Тренд“, за вториот објект неделава Министерството за транспорт и врски веќе распиша конкурс за идејно решение. Се бара архитектонско-урбанистичко решение за хотелот, кој ќе биде со пет ѕвезди во рамки на комплексот Градска куќа и треба да се вклопи во амбиенталната целина со објектите во опкружување. Според објаснувањето од Министерството за транспорт и врски, конкурсот е само дел од подготвителните активности за изградба на комплексот што ќе се гради на државно земјиште, кое е планирано да се продава на лицитација по изборите. Најповолниот понудувач ќе има обврска комплексот да го изгради според избраните конкурси, овој за хотелот и веќе утврдениот за Градска куќа, чиј автор е архитект Коста Мангаровски.

„Најповолниот понудувач, како инвеститор кој ќе ја реализира изградбата, ќе има обврска да го отстапи делот што е предвиден за Градска куќа“, дополнуваат од Министерството за транспорт и врски без конкретен одговор дали екот на изборната кампања не е пречка за распишувањето на конкурсот. Никакво толкување за неговата законитост во актуелниов период не добивме ниту од Антикорупциската комисија.

Инаку, во објавата, иако вообичаено за досега распишаните, во оваа Министерството конкретно не наведува каков стил треба да биде градбата, ниту дали фасадата треба да соодветствува со фасадата на објектот Градска куќа, кој е одлучено да ја зачува „лушпата“ на некогашниот Офицерски дом. Меѓу наведените услови, стои дека објектот треба да има квалитетна релација со Градска куќа, да има оригинален и иновативен изглед, пристап до и во објектот да имаат и лицата со посебни потреби и друго.

Од Министерството за култура пред речиси две години одлучија Градска куќа да се гради според проектот на архитект Коста Мангаровски откако на меѓународниот конкурс не беше доделена прва награда, па од вкупно осум пристигнати труда, два беа рамноправно наградени - конечно избраниот на Мангаровски и идејниот проект изработен од словенечка група архитекти од „Мултиплан архитекти“.