Луѓе гинат, надлежните не градат тротоари

Четирите жртви и десетиците сообраќајни несреќи во последните две години на таканаречениот „пат на смртта“ од Маџари до Катланово не се доволна провокација за надлежните конечно да ги обезбедат пешаците и да изградат тротоари. Населението од повеќе села, повеќе од 20 години ги моли и државните и локалните институции да изградат тротоари, но напразно. Или лажно им ветуваат или си ја префрлуваат топката едни на други. Во меѓувреме, луѓето со големо внимание се движат по коловозот и со страв ги испраќаат децата на училиште, оти по „патот на смртта“ јурат и автомобили и тешки камиони кои ја одбегнуваат патарината кај Петровец.

Претставниците на Иницијативниот одбор на жителите од 12 села сметаат дека Министерството за транспорт нема намера да им помогне околу изградбата на пешачка и велосипедска патека на регионалниот пат Р-103 од Маџари до Катланово. На 26 јануари, на тогашниот заменик-министер за транспорт, Љупчо Димовски, му го изложиле проблемот, по што тој им кажал дека писмено ќе ги информира што понатаму, но шест месеци подоцна одговор нема.

- По одморите ќе бараме прием кај премиерот Никола Груевски, а доколку и тој не не' прими повторно ќе го блокираме патот во знак на револт - вели Трајче Георгиевски, претседател на Иницијативниот одбор.Граѓаните и пред две и пол години го блокираа патот барајќи тротоари, но безуспешно.Од Министерството за транспорт се оградуваат од проблемот и ја префрлуваат одговорноста на Агенцијата за државни патишта и на општините низ кои минува патот.

- Во согласност со Законот за патишта, надлежна институција за управување, изградба, реконструкција и одржување на државните патишта е Агенцијата за државни патишта. Исто така општината, односно Градот Скопје може да побара на дел од државен пат кој поминува во населено место да бидат изградени тротоари, велосипедски патеки или паркинзи, при што зголемените трошоци ги сноси општината, односно Градот - велат во Министерството.

Агенцијата за државни патишта во повеќе наврати тврдеше дека иако се работи за регионален пат, за пешачки и за велосипедски патеки е надлежна локалната самоуправа, поточно општините Гази Баба и Петровец, на чии територии се протега. Општината Гази Баба лани од својот буџет издвои 6,6 милиони денари за изградба на пешачка и велосипедска патека на места каде што тоа ќе биде најпотребно. Поради тоа, Иницијативниот одбор се откажа од блокади и од бојкот на локалните избори.

- Општината нарача проект за пешачка патека на потегот од месноста Рампа во Маџари до Дрма во Идризово, кој ќе чини 500 илјади денари. Исто така, со соларни светилки се осветлени двата моста во населбата Гоце Делчев - вели Емилија Кипровска, портпарол во Гази Баба.Од Општина Петровец велат дека речиси целиот дел од патот кој минува низ нивната територија е покриен со тротоари од едната страна. Патот до Катланово е долг дваесетина километри и по него секојдневно минуваат илјадници возила. Тој минува низ Трубарево, Јурумлери, Идризово, Петровец, Ржаничино и завршува кај Катланово.