ИГМ гради нова железарница

Катерина Попоска

На површина од еден милион метри квадратни во Дуброво, Неготинско, ќе никне нова железарница, вредна 100 милиони евра. Инвеститор е Илија Гечев, сопственикот на кавадаречката компанија за производство на заварени цевки и профили, ИГМ. “Фабриката ќе биде огромна. Сега сме во фаза на откуп на градежните парцели. Со општина Неготино ги договараме деталите околу земјиштето на кое треба да се гради фабриката. Моите проценки се дека за една година фабриката ќе биде готова и ќе почне со работа“, изјави Гечев за “Капитал“, без да ги прецизира деталите за производството и пласманот на производите.

Во новата фабрика ќе се произведува топловалан и ладновалан челик преку фази на собирање, обработка и топење на челичниот отпад, лиење на челикот, од кој на крајот треба да се добијат топловалани лимови, поцинкувани и пластифицирани лимови. Новата железарница во Дуброво треба да отвори 1.000 работни места. Од општина Неготино, задоволни од најавите на инвеститорот, велат дека изградбата на новиот индустриски капацитет ќе значи многу за развојот и напредокот на општината, но и на македонската економија.

“Оваа инвестиција во градот ќе биде најголема во последните 20 години, а доаѓа по претходна одлука на советниците за прифаќање на иницијативата на овој кавадаречки гигант за метални профили за отпочнување постапка за изработка на урбанистички план во населеното место Дуброво. Според плановите, новите вработувања ќе се извршуваат сукцесивно, а проектот ќе се одвива во три фази“, објаснува Сашо Николов, претседател на Советот во општина Неготино. ИГМ од Кавадарци е меѓу 10-те најголеми македонски извозници. Лани оствари нето-добивка од безмалку 10 милиони евра и вкупни приходи од 71,9 милиони евра, што е раст од 117% споредено со остварените приходи во 2009 година. Металуршкиот комбинат вработува околу 350 луѓе.

Кавадаречка инвестиција во Неготино

Неготинци се плашат за здравјето, не за економијата и не сакаат да станат втор Велес

Ангел Данов



Кавадарци - „Потребни ни се и земјоделството и индустријата. Некој треба да произведува здрава храна и квалитетно вино, но некој треба и да ги купува тие производи. Не треба да се користи ситуацијата во Велес за да се спречи инвестицијата во Неготино. Треба да се знае дека основна локомотива на развојот е индустријата и таа мора да има предност пред земјоделството. И затоа неготинчани треба да бидат среќни поради оваа инвестиција“.

Вака сопственикот на „ИГМ трејд“ од Кавадарци, Илија Гечев ја образложува својата идеја да инвестира во изградба на железарница во Неготино, откако наиде на голем отпор кај граѓаните и бизнисмените од Неготино кои се плашат од нови загадувања. Тој не смета дека протестите што се одржаа против неговата инвестиција се резултат на отпорот на неготинските бизнисмени кон кавадаречката инвестиција, бидејќи од секогаш постоел ривалитет меѓу неготинци и кавадарчани.

„Сите стопанственици во Неготино се мои долгогодишни пријатели и воопшто не би сакал да мислам дека стравуваат оти ќе ги загрозам. Тие не би требало да бидат против, напротив, да бидат мои најголеми поддржувачи. Да не филозофираат, туку да инвестираат“, вели Гечев.

Четвртата компанија по извоз во земјава, „ИГМ трејд“ од Кавадарци одлучи да се шири и во Неготино и до Советот на Неготино достави иницијатива за отпочнување постапка за проширување на урбанистичкиот план за катастарска општина Дуброво. Советниците едногласно ја прифатија иницијативата, а поддршка даде и градоначалникот на Неготино, Пане Трајков.

Но, идејата за изградба на железарница ги преплаши граѓаните, сопствениците на винарски визби и бизнисмените во градот, кои стравуваат дека со тоа ќе биде загрозено нивното здравје, а ќе се загадува и производството на храна. Тие до Општината доставија преку 4.500 потписи против изградбата. За Гечев, пак, ваквите стравувања се неоправдани. Тој негира дека во близина на Неготино ќе се гради топилница или цинкара и ги отфрла шпекулациите дека во новите погони ќе се топи радиоактивно железо. Објаснува дека ќе се гради современа интегрална железарница за рециклирање старо железо од увоз. Вели дека од транспарентната еколошка инвестиција бенефит ќе имале и компанијата и Општината и државата и дека за четири години ќе се отвореле околу 1.200 работни места.

„Ни одговара близината на солунското пристаниште кое е на 145 километри, близината на автопатот, железничката пруга, реката Вардар, трафостаницата ’Друброво‘ и можноста природниот гас да стигне прво тука“ се аргументите на Гечев зошто за железарницата е избрана токму неготинската локација.

Тој смета дека не е фер да се прават опструкции во време кога државата бара странски инвестиции нудејќи најразлични поволности. Вели дека ИГМ во наредните денови ќе стори се' да им објасни на граѓаните дека новата инвестиција кај Неготино не претставува никаква опасност за нивното здравје. Доколку не успее во убедувањето, Гечев најави и повлекување, а големата инвестиција ќе ја реализира на друго место.

Сепак, не е мал бројот и на оние неготинци што ја поздравуваат најавената инвестиција, бидејќи, како што велат, Неготино е економски мртов град без можност за вработување на младите, кои се' почесто размислуваат да го напуштат. Поддршка на иницијативата на ИГМ за изградба на железарница дава и претседателот на неготинскиот совет, Сашо Николов. Тој вели дека станува збор за инвестиција каква градот не видел во последните 20 години, која ќе зафаќа површина од речиси еден милион квадрати и во која ќе се произведува топловалан и ладновалан челик преку фази на собирање, обработка и топење на челичен отпад, лиење челик, добивање топловалани лимови, поцинкувани и пластифицирани лимови.

Грозјето ќе ја „крои“ дозволата за железарница кај Неготино

Ниту Министерството за животна средина ниту Владата нема да дозволат да се гради капацитет кој ќе биде спротивен на интересите на неготинци, изјави министерот за животна средина Абдулаким Адеми во Неготино, по јавната расправа на која се говореше за најавената изградба на железарница кај Неготино.

- Се интересиравме дали ќе има негативно влијание за грозјето бидејќи државата субвенционира грозје и винарски визби. Доколку има негативно влијание, секако дека не е добро - изјави министерот.

Рече дека дошле за да ги уверат неготинци дека државата ќе ги преземе сите мерки за заштита на животната средина. Се надева дека Градскиот совет ќе донел правилна одлука имајќи ги предвид излагањата на инвеститорот, но и мислењето на граѓаните.

Јавната расправа се одржа по иницијатива на компанијата „ИГМ-трејд“ од Kавадарци која сака да гради железарница во атарот на неготинските села Дуброво и Тремник, а имаше за цел да се разбие стравот кај населението од изградбата на капацитет за топење челик и да се утврди дека инвестицијата ќе биде во рамките на законите.

Дел од присутните на презентацијата беа со став дека инвестицијата негативно ќе влијае врз неготинската животната средина и лозарството и винарството.

На средбата беше презентиран извештајот за стратегиската оценка на животната средина, при што беше нагласено дека доколку инвеститорот не ги почитува препораките на надлежните, нема да ги добие потребните дозволи. Со новата инвестиција „ИГМ-трејд“ планира по комплетното завршување на капацитетот од 6 години во железарницата да вработи 1.700 лица. (С.Д.)

http://www.dnevnik.com.mk/?ItemID=DB82FF89AF743640939650B54421BDE3