Милениумски Крст

Градоначалникот на Град Скопје, Коце Трајановски, денес го означи почетокот на градежните работи за уредување на платото околу Милениумскиот крст.

Платото ќе го облагороди просторот околу Милениумскиот крст, а на посетителите на врвот на Водно и на корисниците на жичарницата ќе им понуди пријатно катче за одмор и рекреација.

-Ова плато ќе биде направено од два круга, поголемиот е со радиус од 20 метри, а помалиот со радиус од 8 метри. Ќе биде направено од природен камен, кој ќе се вклопи во амбиентот околу крстот и врвот на планината Водно. Вредноста на инвестицијата ќе биде 5 милиони денари, а рокот на изградба ќе биде 2 месеци, рече Трајановски.

Во изградба се и 3 павиљони, односно летниковци, до кои ќе се прави детско игралиште.

ЌЕ СЕ УРЕДИ ПЛАТОТО ОКОЛУ МИЛЕНИУМСКИОТ КРСТ

Амфитеатар на врвот на Водно!

Почетокот на изградбата беше означен вчера, а ќе заврши за два месеци, поточно пред официјалното пуштање во употреба на жичницата на Водно, што е веќе закажано за 24 мај

Платото околу Милениумскиот крст по цели 11 години ќе се оплемени и ќе прерасне во пријатно катче за одмор и рекреација на посетителите. Според авторот на целокупниот проект на, Јован Стефановски - Жан, ќе се гради амфитеатар, мал плоштад, детско игралиште и видиковци од природни материјали кои ќе го оплеменат целокупниот амбиент. Почетокот на изградбата беше означен вчера, а ќе заврши за два месеци, поточно пред официјалното пуштање во употреба на жичницата на Водно, што е веќе е закажано за 24 мај.
- Од десната страна на Крстот ќе се гради амфитеатар со радиус од 20 метри, а од левата мал кружен плоштад со радиус од 8 метри. Тие, заедно со кругот на кој е поставен крстот, се три круга кои го претставуваат светото тројство. Околу круговите ќе се постават клупи и корпи за отпадоци, просторот ќе се осветли, а кон двата круга ќе води патека покриена со рустикални камења. На тој начин оваа локација ќе се отвори и за организирање уметнички манифестации, ни откри авторот Стефановски - Жан.

Заедно со уредувањето на платото, ќе се уреди и просторот околу планинарскиот камен кој претставува највисоката кота на Водно, на кој ќе стои натпис Крстовар 1066,74 метри нв, а ќе биде означен и катастарскиот камен којшто е обележје на првата поставена геодетска кота.
До Милениумски крст вчера се искачија и премиерот Никола Груевски, скопскиот градоначалник Коце Трајановски, поглаварот на МПЦ г.г. Стефан и голем број граѓани и екологисти кои претходно, во подножјето на Крстот засадија дрвца.

Проектот ќе го реализира Град Скопје кој за таа намена ќе потроши 4,7 милиони денари. Градоначалникот потенцираше дека овие активности не треба да се сватат како предизборна кампања бидејќи оваа активност е дел од план за работа на Градот за годинава и е предвидена со буџетот уште во декември, лани.
- Во следниот период се подготвуваме за реализација на голем број активности за кои се завршени јавните набавки и не би сакал тие да добијат друга конотација, рече Трајановски.

(Е.А.)
фото: Ѓ.ЛИЧОВСКИ

http://www.vecer.com.mk/default.asp?ItemID=34258FCD113810479578B02D62927A97