Црква на Плоштад Македонија

ЗАВРШИ МЕЃУНАРОДНИОТ КОНКУРС НА МИНИСТЕРСТВОТО ЗА КУЛТУРА

За владината црква се тркаат 16 проекти

Од Министерството ќе почекаат до крајот на неделава да пристигнат и идејните решенија на странските автори, а од понеделник ќе почне оценувањето

Шеснаесет труда пристигнале на меѓународниот конкурс за изградба на црквата што Владата ќе ја гради на плоштадот Македонија, на просторот помеѓу „Сити галери“ и ресторанот „Дал мет фу“. Конкурсот што го распиша Министерството за култура беше затворен на 24 април, но надлежните ќе почекаат уште неколку дена пред да почне оценувањето, оти ќе се почекаат идејните решенија од странските автори. Комисијата што ќе ги вреднува архитектонските трудови ќе биде формирана в петок, а ќе почне да работи од понеделник.Бидејќи се подигнати проектни програми и од странство, а трудовите се' уште не пристигнале, ќе причекаме до крајот на неделата пред оценувањето. Се работи за сложена царинска постапка и затоа сме принудени малку да одложиме - вели Елизабета Канческа-Милевска, државна секретарка во Министерството за култура.Во конкурсот се предвидени три награди за најдобрите идејни архитектонски решенија. Ако има прва награда, авторот ќе добие 400.000 денари, а црквата ќе се гради според неговиот проект. Втората награда ќе изнесува 250.000 денари, третата 150.000 денари, а ќе има и два откупа од по 30.000 денари. Сите трудови ќе бидат претставени на изложба во Министерството за култура. Во конкурсот не беше истакнато колкави димензии треба да има објектот, туку беа посочени само општите услови што треба да ги исполнат учесниците. Најверојатно, црквата ќе биде висока 29 метри, бидејќи толкава е максималната височина на сите објекти во строгиот центар на Скопје, околу плоштадот.Таа ќе се гради со пари од државниот буџет, по иницијатива на премиерот Никола Груевски, која едногласно беше прифатена од целата Влада. Образложението за ваквата иницијатива на Владата, според портпаролот Ивица Боцевски, беше дека некогаш во близина на плоштадот постоел храмот „Свети Константин и Елена“ и дека на плоштадите во речиси сите европски метрополи постојат цркви. За остварување на целта Советот на Општина Центар експресно го смени и детаљниот урбанистички план за Малиот ринг и исцрта голема градежна маркичка со намена за црква на просторот до „Дал мет фу“.Најавата дека на плоштадот ќе се гради црква со државни пари предизвика остри и поделени реакции во јавноста, и кај граѓаните и кај експертите. Повеќето од архитектите не се согласија дека на предвидениот простор треба да се гради црква со висина од 29 метри, а граѓаните потпишуваа интернет-петиција против сакралниот објект.За новата црква се шпекулираше дека ќе се вика „Свети Никола“, но за тоа треба да одлучи МПЦ.

(А.П.)

Се чека членот од Ватикан за да се фромира комисијата за црквата

Се' уште не се разгледани трудовите што пристигнаа на меѓународниот конкурс за изградба на црквата на плоштадот Македонија, кој го распиша Министерството за култура. Комисијата не е формирана оти се чека да пристигне еден нејзин член од Ватикан. Се очекува тој да пристигне во наредната недела, кога и официјално ќе се формира комисијата и ќе почне постапката за избор на идејното решение според кое би се градела црквата. Комисијата ќе биде составена од 9 или 11 члена, од кои повеќето ќе бидат стручни лица, односно архитекти, но ќе има и претставници од црквата, правници, економисти и други експерти - вели Елизабета Канческа-Милевска, државна секретарка во Министерството за култура. На меѓународниот конкурс за идејно решение за изградба на црквата пристигнале 17 домашни и странски труда. Конкурсот беше затворен на 24 април, по што се чекаше уште некое време да пристигнат идејните решенија од странските автори. Предвидени се три награди за најдобрите идејни архитектонски решенија. Ако има прва награда, авторот ќе добие 400.000 денари, а црквата ќе се гради според неговиот проект. Втората награда ќе изнесува 250.000 денари, третата 150.000 денари, а ќе има и два откупа од по 30.000 денари. Сите трудови ќе бидат претставени на изложба во Министерството за култура. Во конкурсот не беше истакнато колкави димензии треба да има објектот, туку беа посочени само општите услови што треба да ги исполнат учесниците. Најверојатно, црквата ќе биде висока 29 метри, бидејќи толкава е максималната височина на сите објекти во строгиот центар на Скопје околу плоштадот.Црквата ќе се гради со пари од државниот буџет, по иницијатива на премиерот Никола Груевски, на просторот помеѓу ресторанот „Дал мет фу“ и стоковната куќа „Сити галери“. Образложението за ваквата иницијатива на Владата беше дека некогаш во близина на плоштадот постоел храмот „Свети Константин и Елена“ и дека на плоштадите во речиси сите европски метрополи има цркви. Сепак, најавата за изградба на црква на плоштадот со државни пари предизвика остри и поделени реакции во јавноста и кај граѓаните и кај експертите.

(А.П.)

Во доработениот ДУП црквата останува на плоштад

Градските власти повторно го имаат на увид Деталниот урбанистички план за централното подрачје „Мал ринг“ откако надлежните од Општина Центар пред дваесетина дена без образложение го повлекоа на доработка. Иако се шпекулираше дека Општината го врати ДУП со намера да се извршат одредени интервенции во урбанистичкото решение за црквата што треба да се гради на плоштадот „Македонија“, планот, во посочениот дел, како што велат од Градот, воопшто не е коригиран.

„Верскиот објект и во доставениот план е во истите рамки и граници како и претходно. Лоциран е на плоштадот, без никакви измени во однос на претходната верзија“, велат градските власти кои деновиве ќе го проверуваат ДУП и најдоцна за десетина дена ќе треба да изготват мислење за него. Засега од Градот не можат да посочат какви измени се направени пред ДУП-от да биде повлечен на доработка. (Дс.Т.)