После 15 дена откако седуметарскиот бронзен споменик на Никола Карев во повеќе делови се донесе пред Собранието, денеска конечно екипата од уметничката италијанска леарница „Маринели“ го кренаа на постаментот.
Уште на стартот се најави дека склопувањето и монтажата нема да се изведат брзо, бидејќи, како што информираа од општина Центаr, пред сé, се работи за голем споменик чии делови се спојуваат и обработуваат на лице место.
Во моментот се прават подготовки за монтажа, се средуваат техничките детали, а не се знае дали коњаникот ќе остане на постаментот од денеска, или пак се работи само за пробно поставување.
Долгиот период на склопувањето на спомeникот рашири гласини во јавноста дека одолговлекувањето на неговата монтажа е поради наводно малите димензии на постаменот, кој требало да се поправи, но од општина Центар ги демантираат шпекулациите. Посочуваат дека постаментот е направен според претходно изготвен и утврден проект и не постои никаков проблем.
Постаментот е веќе обложен со декорација од бронзени релјефи.                                                           

ГМВ/БИ