Булевар Илинден

Започнало уривањето на објектите коишто се наоѓаат на булеварот Илинден на потегот од Зоолошката градина до чистината спроти зградата во која што порано беше сместена амбасада на САД.

Градот Скопје вчера почна со расчистување на локацијата од Зоолошката градина до чистината спроти зградата во којашто порано беше сместена Американската амбасада, а до крајот на месецов ќе почне со проширување на најспорниот дел од трасата - од Владата до Фонтана

Градот Скопје вчера почна со расчистување на локацијата од Зоолошката градина до чистината спроти зградата во којашто порано беше сместена Американската амбасада, каде што треба да поминува трасата на булеварот Илинденска. Ќе се уриваат неколку мали помошни објекти гаражи, шупи, плевни, а целата акција според надлежните би требало да заврши крајот на неделава.
- Објектите на тој потег се уриваат за непречено да продолжат градежните работи за проширување на булеварот Илинден, информираат од Град Скопје и додаваат дека се решени сите имотно-правни проблеми.

Тие велат дека проблемот е решен и околу проширувањето на најспорниот дел од новата булеварска траса од Владата до фонтаната Лотос во Градски парк, проект кој треба да почне со реализација до крајот на месецов и да заврши за два месеци.
- Додека трае изградбата на сите фази од проширувањето на Илинденска, ние ќе воведуваме времени сообраќајни решенија и граѓаните ќе бидат благовремено информирани за насоките за движење. Имотно-правните проблеми се регулираат и веќе на втората делница од втората фаза сопствениците сами ги отстрануваат објектите од трасата, информираат од Градот.
Деновиве пак, веќе проширениот дел од булеварот Илинден од крстосницата со улицата Наум Наумовски Борче до крстосницата со улицата Рузвелтова, екипите на Градот Скопје го бележат со хоризонтална сигнализација. На овој дел од булеварот се поставуваат и нови семафори и сообраќајни знаци.

Градот Скопје ја почна и реконструкцијата на јавните зелени површини на булеварот Илинден. На потегот од Матичната служба до раскрсницата со улицата Рузвелтова се уредува просторот и се поставува хидрантска мрежа, што потоа ќе може да се користи и за рачно полевање на зеленилото.

Проектот за проширување на булеварот Илинден е инвестиција на Град Скопје и ќе чини 120 милиони денари. Свеченото пуштање во употреба е планирано за Денот на независноста 8 Септември.

Се обележува „Илинденска“