Македонски народен театар (Стар театар)

СЕ ЧЕКА ИДЕЈНО РЕШЕНИЕ

Стариот театар ќе се закити со 52 скулптури

Објектот треба да го добие идентичниот изглед на стариот театар кој беше урнат 1963-та за време на земјотресот, но во техничка смисла ќе биде еден од најмодерните во Европа

На фасадата на Стариот театар, кој во моментов се гради на левиот брег на Вардар, се планира да бидат поставени 46 скулптури, додека 8 ќе го красат партерот. По неодамна распишаниот конкурс во Министерството за култура се очекуваат идејните решенија за вкупно 24 скулптури, од кои 16 ќе се изработуваат за фасада и тие понатаму ќе се реплицираат до најмногу 46.

"Ваквата одлука е донесена, пред се, од економични причини, бидејќи истите понатаму треба да бидат изработени од траен лесен материјал, но не мермер и бронза. На сите четири страни од партерот, пак, ќе бидат поставени по две скулптури или вкупно осум и тие ќе бидат изработени од мермер", објаснуваат во Министерството за култура на РМ. Ова, додаваат, е во согласност со проектот за скулпторски работи и надворешна орнаментика за Стариот театар. Притоа фасадните скулптури ќе бидат со големина 220 санитиметри, а осумте скулптури на партерот ќе бидат високи 240 сантиметри.

Како што велат од Министерството, во конкурсот е прецизиран и мотивот, па така, скулптурите треба да сочинуваат естетската целина со зададениот архитектонски простор. Скулптурите треба да претставуваат човечки фигури (машки и женски) реалистично изведени, кои ќе ја доловуваат атмосферата на драмата, комедијата и трагедијата и кои со својата појава ќе упатуваат на содржините на театарот, литературата, музиката и уметноста воопшто. Како ќе изгледаат скулптурите ќе се знае по 6 септември кога завршува конкурсот.

Камен-темелникот на Стариот театар, кој е лоциран до музејскиот комплекс "Македонска борба", беше поставен во текот на 2007 година, а се планира да биде целосно завршен на крајот од 2011 година. Објектот треба да го добие идентичниот изглед на стариот театар кој беше урнат во 1963-та година за време на земјотресот, но во техничка смисла ќе биде еден од најмодерните во Европа. Театарот ќе има две сцени, од кои главната театарска сала ќе биде со капацитет од 756 седишта, а малата алтернативна сала ќе има 236 седишта.

Што се однесува до намената, Стариот театар кој се гради според идејното решение на архитектот Јован Стефановски-Жан, ќе биде репрезентативно место во кое ќе се реализираат голем број настани од повеќе дејности од културата, театарските претстави, концерти, промоции...