Вести

„Летница“ во Охрид со нова архитектура

Советниците на ВМРО-ДПМНЕ се сомневаат дека ќе се наруши рамнотежата

Симон Илиевски


ОХРИД - Информацијата дека на местото на популарната „Летница“ што се наоѓа на плоштадот „Св. Климент Охридски“ во Охрид ќе никне трговски центар ја разбранува јавноста. Нема потреба од загриженост затоа што ќе нема големи промени, тврдат во Одделението за урбанизам при локалната самоуправа. Притоа, објаснуваат дека станува збор само за нова архитектура на „Летница“, која е трговско-деловен, но и угостителски објект. Тоа значи дека подновениот објект нема да отстапува во габарит и во висина, односно нема да го наруши амбиентот во центарот на Охрид.

Со измените на Деталниот урбанистички план донесен во 2000 година, на сегашната локација на „Летница“ е предвиден трговско-угостителски објект на пет илјади квадрати корисна површина. „Инвеститорите доставија барање за дозвола за градба и план во кој се гледа дека нема отстапување во габаритот на објектот и неговата висина. Единствено има измени во надградбата која и сега постои, но поради старото решение, веројатно просторот не е функционален и не се користи“, објаснуваат во локалната самоуправа.

Сомнежите дека со изградба на новиот објект на „Летница“ може да се наруши архитектонскиот амбиент во центарот на Охрид, во Градскиот совет ги отвори советничката група на ВМРО-ДПМНЕ. „На седниците се нудат многу одлуки од урбанистичката сфера, а за нив имаме малку информации. Затоа сме внимателни да не ни се подметнат решенија зад кои стојат непознати интереси и со кои би се нарушила архитектонската рамнотежа, особено во срцето на градот“, објаснува советникот од ВМРО-ДПМНЕ, Дејан Пановски.

Планот за изградба на нов објект на постојниот комплекс „Летница“ е доставен до Заводот за заштита на спомениците на културата и музеј од Охрид, кој според законот треба да даде согласност и стручно мислење дали со изградбата се нарушува амбиентот на старото градско јадро или се оштетува важен археолошки локалитет.

„Ние го разгледавме проектот и веројатно ќе немаме многу забелешки“, вели Тања Паскали-Ташевска, директорка на Охридскиот завод и музеј. Таа додава дека истите архитекти што го проектирале постојниот објект се автори и на новиот, а добро се запознати со сите детали за функционалноста и изгледот на целиот простор на градскиот плоштад.

Познавачите на приликите во урбанистичката сфера велат дека би било многу опасно доколку некој се охрабри и дозволи промена на габаритот и висината, а особено одење во длабочина од постојниот објект. На просторот меѓу „Летница“ и споменикот Св. Климент Охридски повеќе од една деценија има импровизиран простор со икони. Иницијаторите бараа дозвола на местото каде што порано била црквата „Свети Димитрија“ да се изгради нова. Паралелно за истото место Исламската верска заедница бара да е возобнови џамијата, која била изградена на темелите на црквата, а била урната во 50-тите години на минатиот век. Постојниот објект не може да се шири и на просторот кон трговскиот центар „Амам“ зашто со денационализација местото и' е вратено на Исламската верска заедница. Според Деталниот урбанистички план, тука е планирана јавна површина и не може да се гради.

Промената на постојната урбанистичка состојба околу градскиот плоштад „Летница“ би актуализирала многу отворени прашања. Пред се', како што опоменуваат експертите, со изградба на црква и џамија просторот би се пренатрупал, а сето тоа би придонело и за нарушување на меѓуетничките односи. Во таков случај ретко кој ќе може да им објасни на странските туристи зашто покрај толку многу постојни цркви и џамии на плоштадот во Охрид, се изградиле нови кои дефинитивно ќе го нарушат сегашниот амбиент и спојот меѓу чаршијата, плоштадот и езерото.

Хрватскиот гигант Агрокор во Струмица ќе гради откупно-дистрибутивен  центар со пропратни содржини. Фирмата ќерка „Агрофруктус“ ДОО – Валандово е избрана за најповолен понудувач на наддавањето за 99-годишен закуп на земјиштето со површина од  52.815 метри квадратни. Со договорот закупецот се обврзува дека  предвидениот објект  со деталниот урбанистички план „Дел од УЕ 6 Урбан Блок 9 Струмица“ ќе го изгради  во  рок  од 3 години. Агрокор од поодамна најавува инвестиции во Македонија.

Во Кочани пак, се подготвува изградба на агроберза. Тамошната локална самоуправа и холандската компанија „Go 4 Agri“ неодамна потпишаа договор за нејзина реализација, како и за откуп и за пласман на раноградинарски производи и за користење на геотермални води. Во тек е подготовка на урбанистичка документација  за просторот од околу 210.000 метри квадратни на кој треба да никне агроберзата со пропратните објекти.