Железници (општо)

Со Кенеди и Горбачов по пругата на Тито

Чиста среќа е што досега немало несреќа со жртви, вели членството на Син­ди­ка­тот на машинскиот персонал во Железници, кој тврди дека линијата до Битола и до Кичево се одржува со локомотиви "кенеди" од шеесеттите години на минатиот век, а линијата до Гевгелија со машини од времето на прет­се­да­те­лот на Советскиот Сојуз Михаил Горбачов

Ло­ко­мо­ти­ви стари и до педесет години ги влечат вагоните на "Македонски же­лез­ни­ци" во кои секојдневно се возат стотици луѓе. Чиста среќа е што досега не­ма­ло несреќа со жртви, вели членството на Синдикатот на машинскиот пер­со­нал во Железници, кое минатата недела на прес -конференција го повика ра­ко­водс­тво­то и државата итно да ја подобри безбедноста на железничкиот со­об­ра­ќај во државава. За 20 години независност, Македонија нема изградено ни метар нова пруга. Целата железничка мрежа е поставена уште во време на СФРЈ, а се подновува само кога кога се крадат шините. Според Синдикатот, и во­зо­ви­те и шините се распаѓаат, а дел од локомотивите, кои се стари по по­ло­ви­на век, слободно може да бидат музејски примероци.
"'Ке­не­ди' вози до Битола и Кичево. Тоа е дизел-локомотива, стара педесетина го­ди­ни, од времето на американскиот претстедател Кенеди. Само оваа ма­ши­на може да ги искачи висините до двата града бидејќи железницата на овој дел од Македонија не е електрифицирана. Оваа локомотива има и парен по­гон кој зиме треба да ги затоплува вагоните, но бадијала што го има бидејќи не функционира оти цевките низ кои треба да поминува пареата се за­тнатни од 'рѓа. 'Горбачов', пак, кој од СССР од времето на Горбачов, сообраќа од Та­ба­нов­це до Скопје и од Скопје до Гевгелија по коридорот 10 кој води до ЕУ. И 'кенеди' и 'горбачов' локомотивите се во очајна состојба и ако под итно не се обноват, не дај боже може да бидат кобни", ни рекоа вчера членовите на Син­ди­ка­тот.
Тие не беа сигурни кога последен пат компанијата купила нови вагони, но ве­лат дека лани било направено репарација на неколку локомотиви. Ма­ши­но­во­за­чи­те објаснуваат дека за нивна лична безбедност и безбедност на пат­ни­ци­те, иако предвидената максимална брзина за возовите во земјава е 100 км на час, ретко кога ја постигнуваат.
Ра­ко­водс­тво­то на "Македонски железници АД Транспорт" вчера не одговори на прашањето на "Вест" кога последен пат се купени нови локомотиви и ва­го­ни. Генералниот директор Благоја Крстевски во неговиот писмен одговор об­јас­ну­ва дека за проектот "Реформи во железницата" досега се вложени 9 ми­ли­о­ни евра.
"Нап­ра­ве­на е модернизација на две електрични локомотиви на кои им е вгра­ден нов систем на кочење, а 4 маневарски машини добија екомотори и систем за кочење. До крајот на годината сите четири треба да пристигнат за екс­пло­а­та­ци­ја", вели Крстевски.
Крс­тев­ски најавува дека е во тек и набавка на 36 плато вагони, а во 2010 го­ди­на е предвидена поправка на дизел-моторен воз и 10 патнички вагони, за која се предвидени 68 милиони денари. (И.С.)

Се лизна вагон кај Чашка поради пукната оска

Ва­гон на патнички, воз кој прексиноќа сообраќаше од Скопје кон Би­то­ла, излезе од шините на еден и пол километар пред Железничката станица во Чашка. За среќа, нема повредени патници, иако дефектот на вагонот пре­диз­ви­ка паника кај патниците. Возот, кој бил полн со патници, вед­наш бил запрен.
"Пук­на­та оска на двете тркала на вагонот била причина за де­фек­тот кој го предизвикал лизнувањето", соопштија првично од увид­на­та екипа на ЈП "Македонски железници", која на полноќ стигна на са­мо­то место. Откачениот вагон околу половина километар се движел по др­ве­ни­те прагови, но тоа не предизвикало оштетување на же­лез­нич­ка­та пруга, уверуваа од увидната екипа на ЈП. Тие тврдеа дека возовите ќе продолжат да се движат по пругата, на оштетениот дел ќе возат со на­ма­ле­на брзина, и тоа ќе било безбедно за патниците. Вчераутро де­фек­тни­от вагон од битолскиот патнички воз беше однесен до депото на "Ма­ке­дон­ски железници" во Лисиче. "По извршеното вештачење, ќе се знае зошто се лизнале двете тркала на вагонот од шините", изјави ди­рек­то­рот на МЖ - Транспорт Благоја Крстевски. (У. Ј.)                                                                                                                                                   http://www.vest.com.mk/?ItemID=20A75380AA21AE45BF83230D4AAC5CA5  

Елена Костовска

Дотраените пруги и честите несреќи може да ги одвратат малкуте приватни инвеститори кои, со измените на законот кои наскоро треба да се донесат, ќе можат да вршат железнички транспорт. Законот напразно ќе се донесе ако во меѓувреме не се инвестира во поголема безбедност на пругите и ако не се овозможи по нив да се вози со поголема брзина, велат упатените во овој сектор.
Со новиот Закон за железничкиот сообраќај, кој наскоро треба да се најде во Собранието, ќе се либерализира железничкиот транспорт, во кој досега монопол има државата и нејзините јавни претпријатија. Со Законот се предвидува приватни странски и домашни фирми да можат да превезуваат стока и патници, а инфраструктурата ќе ја одржува посебно јавно претпријатие. За таа цел некогашното „Македонски железници“ беше поделено на „МЖ - транспорт“ и „МЖ - инфраструктура“. Се очекува таквата поставеност да внесе конкуренција на пазарот и подобрување на транспортните услуги во железничкиот сообраќај.
Сепак, главен услов, велат познавачите, е инфраструктурата да биде квалитетно одржувана и безбедна. Според европските директиви, одржувачот на инфраструктурата мора да овозможи возовите безбедно да се движат по пругите со брзина до 120 километри на час, а кај нас таа брзина не е поголема од 100 километри на час. Државата им преземено обврска да го стори тоа, но нема доволно пари за реновирање на пругите. Без овој услов тешко дека странски инвеститори ќе се нафатат да инвестираат во македонскиот железнички транспорт.
Засега само една домашна компанија, „Делта реил карго“, пројавува интерес да организира товарен транспорт, а за патнички сообраќај засега нема никаков интерес. Откако ќе се донесе Законот, за товарниот сообраќај се очекува да се заинтересираат и компании од соседството, но за патничкиот потешко. Упатените велат дека патничкиот сообраќај станува се понеисплатлив, па во некои земји дури и се субвенционира.
Косопственик на „Делта реил карго“, Иван Илиевски, вели дека нивната компанија е подготвена да инвестира иако е свесна за ризикот.
- Инфраструктурата не се одржува, а колосеците се дотраени. По несреќите што се случија во последниот период се знак дека „МЖ - инфраструктура“ мора да дејствува. Со влезот на приватните оператори тие ќе мора да плаќаат пенали ако поради нивна грешка дојде до некоја несреќа. Ова ќе ги принуди да инвестираат. Ние сме свесни за ситуацијата, но нема бизнис без ризик - вели Илиевски.
Според опозициската СДСМ, овие железнички несреќи можеле да се очекуваат зашто државата веќе четири години нема инвестирано ни денар во железничката инфраструктура, ниту, пак, во обнова на возниот парк.
- Со новиот закон, ако дојдат странски оператори со брзи машини, секојдневно ќе има несреќи зашто поради неприспособената брзина ќе излетуваат надвор од шините. Конкурентските куќи од Србија, Бугарија и од Грција ќе се јават за товарниот сообраќај кој е исплатлив, но со тоа си ја сечеме гранката на која седиме зашто ќе се намали работата на „Македонски железници“, кои поради тоа ќе отпуштаат работници – вели пратеникот Томе Чинговски.


Штрајкуваат грчките железничари


Вработените во грчки железници од вчера се во генерален штрајк. Поради прекинатиот возен ред, возовите кои преку Гевгелија сообраќаат кон Грција ќе ги превезуваат патниците само до македонската граница. За време на ваквите штрајкови, вообичаено е обезбеден автобуски превоз од последната железничка станица до која вози возот, до крајната дестинација.

Извор: Време, http://www.vreme.com.mk/DesktopDefault.aspx?tabindex=3&tabid=1&EditionID=1983&ArticleID=137551

Велосипед побрз од возот

Повеќе стотици патници вчера останаа на железничките станици меѓу Прилеп и Велес и беа принудени да бараат алтернативен превоз, бидејќи возот од Битола кон Скопје покрај тоа што доцнеше, немаше ни доволно вагони за да ги прими сите што купиле карти

Неколку стотици патници завчера попладне останаа на повеќе железнички станици да се снаоѓаат како знаат и умеат бидејќи неколкуте вагони на возот од Битола за Скопје беа премалку за да ги примат сите што се враќаа од прослава на Велигден. Возот беше преполн и бавен. Побрз од возот на македонски железници беше и велосипедистот Андреј Ристовски, кој откако не успеал да најде место од станицата во Богомила, возел со велосипедот до Велес во надеж дека таму ќе најде празно место и ќе се врати во Скопје. Тргнал истовремено со возот од Богомила и за 80 минути стигнал до Велес, а имаше и време да здивне и да го почека возот, но повторно немаше среќа да се качи. Композицијата која доаѓаше од Битола беше преполна, па стотината патници од железничката станица од Велес, меѓу нив и Ристевски, останаа да го чекаат следниот воз.

- Купив карта во Богомила, а кога стигна возот, по цел час задоцнување, немаше место. Беше страшно тоа што стари луѓе и семејства со деца останаа на железничката станица, бидејќи не постоеше физичка можност тие да се качат во возот. Тој беше преполн со патници, вратата не се отвораше. Па решив да возам до Велес, педесетина километри, со надеж дека тука ќе се симнат некои и јас ќе се качам, но и овде состојбата е иста. Го чекам следниот воз за да си отидам дома - вели Ристовски.

Патниците, кои како сардини се туркаа во тесните и задушливи ходници и преполните купиња, беа гневни, лути, нервозни... Во возот една старица се качила од станицата во Гостиражни, а се симна во Велес. Таа имала среќа да ја примат во кабината на машиновозачот.

- Срамота е на Велигден да се пуштат четири коли на релацијата Битола - Скопје, а возот уште во Битола бил преполн. Имав среќа што кондуктерот ме пушти кај машинистот и така дојдов до дома. Знаете ли колку луѓе останаа по станиците, во пустелија, бидејќи не ги качија. Тие мора да чекаат пет саати за да се качат на вечерниот воз - рече старицата, на која не и' пречело да седи кај машинистот само да стигне дома.

Според патниците, само во Богомила останале седумдесетина лица, исто толку во Чашка, стотина во Велес, плус десетици по малите станици и постојки на релацијата од Прилеп до Велес. Ова, велат, не бил прв случај патниците да останат по станиците, бидејќи железницата знаела да утне на празник со бројот на патнички коли. Посочуваат дека за жителите од Азот таа е единствениот избор, нема автобуски линии за да стигнат до кој било дел до земјава. Во Прилеп, поради незадоволството од патниците што не можеле да се качат на возот, морала и полицијата да ги смирува луѓето. За нив беше несфатливо каква била оценката на ЈП „Македонски железници - Транспорт“ што на толку голем празник, кога голем број луѓе заминаа од Скопје кон внатрешноста, при што тогаш имало по осум патнички коли, сега истиот број луѓе да се врати со четири. Среќна околност е што вечерниот воз од Битола бил со шест коли, иако со задоцнување од еден час, сепак патниците од регионот на Азот стигнале во Скопје пред полноќ. Дел од нив, кои останаа на железничката во Велес, спас за да заминат во Скопје побараа на автобуската станица. Но и таму слична слика. Малкуте автобуси што влегувале во Велес примале само по два-три патници, колку што имало слободни места. Доцнењето на возот од Битола со 80 минути предизвика верижна реакција и други возови да не тргнат навреме. Таков беше случајот со возот за Кочани, кој иако стигна навреме на железничката во Велес во 16.40, тука чекаше се' додека не дојде тој до Битола. Ова ги разлути многубројните патници, кои 50 минути стоеја во место.

- Катастрофа е благ збор. Ни рекоа дека мора да го чекаме возот од Битола бидејќи имало голем број наши колеги-студенти од Битола и од Прилеп кои тука се префрлаат за да заминеме во Штип на факултет. Ни фалеше уште патниците да почнат да ги качуваат на покривот како во Индија. Ете толку простор има во возовите за патниците на Велигден. Длабоко сме разочарани бидејќи не не' третираат како луѓе, туку како стока - вели студентка од Скопје која учи во Штип. Од ЈП „МЖ-Транспорт“ доаѓаат смирувачки тонови, дека сите патници се превезени.

- Патниците што не биле превезени со пладневниот воз, биле прифатени со вечерниот. Никој не останал на станица. Толкави ни се можностите, што да правиме. Шест патнички вагони во велешка Колска веќе два месеца се на поправка и ги чекаме за да се пополни бројот на коли - велат од раководството на ЈП МЖ - Транспорт.

Од Колска, пак, одговараат дека за да се изврши поправка, железницата треба да префрли пари за неопходните делови.

Петар Печков

Директорот на железницата излезе од колосек

Синдикалецот Пејовски тврди дека решението за отстранување од работа го добил како казна оти предупредил дека железничкиот сообраќај во земјава е небезбеден

Синдикалецот Ристо Пејовски, кој јавно предупреди дека возовите во земјава се небезбедни и навести можна железничка несреќа, која потоа се случи, завчера е отстранет од работа со можност да добие и отказ. Решението е со потпис од директорот на „Македонски железници - Транспорт“, Благоја Крстевски, кој помина без последици за трите несреќи за десет дена и за препораката до патниците да се држат за рачните сопирачки за да спречат железничка катастрофа. Според образложението на директорот, Пејовски, кој има 25-годишен стаж како машиновозач, бил отстранет од работа бидејќи со своите изјави го нарушил угледот на железничкото претпријатие.

Пејовски, кој е претседател на Независниот синдикат на машинскиот персонал во железничкото транспортно претпријатие, тврди дека решението го добил како казна оти предупредил дека железничкиот сообраќај во земјава е небезбеден. Тој го повика генералниот директор на претпријатието да каже колку локомотивите се технички исправни и дали е почитувана безбедноста на вработените и на патниците.

- Решението на директорот се коси со Законот за работните односи и со колективниот договор на претпријатието каде синдикалниот работник е заштитен по три основи. Решението е директен атак врз мене како синдикален лидер. Безбедноста не може да биде табу-тема. За неа треба да се зборува и јавноста да биде запознаена - изјави Пејовски на вчерашната конференција за печат.

Тој додаде дека се испочитувани само минималните услови за безбедност во железничкиот сообраќајот бидејќи тековните и инвестициските одржувања се целосно запоставени.

Тој информира дека дел од вработените во МЖ почнале да собираат петиција во негова одбрана и го повика раководството на компанијата на разговор за да се надминат недоразбирањата.

Од „Македонски железници - Транспорт“ вчера не сакаа да коментираат за причините зошто Пејовски е отстранет од работа.

Неколкуте железнички инциденти последниов период, во кој, за среќа, немаше жртви, не ги загрижи властите, ниту надлежните во „Македонски железници“. Министерот за транспорт и врски Миле Јанакиески, кој е надлежен за овој сектор јавно побара медиумите да не се повикуваат на изјави од, како што рече, нерепрезентативни синдикалци и изјави дека железницата во земјава биле безбедна.

За краток период имаше три железнички несреќи во земјава од кои во една имаше и осум повредени лица. Состојбата во железница е повеќе од застрашувачка.

Локомотиви и вагони стари и по 40 години, кои често се расипуваат. Инвестициите во железница со години се сведени на минимум и наместо за подновување на возниот парк и инфраструктурата, парите најчесто завршуваат за плати на вработените. За изминатите 60 години е изградена само една пруга во земјава на релација Скопје- Кичево.

Директорот на транспортното претпријатие на железница, Крстевски, се амнестира од одговорност и ги повика патниците да имаат предвид дека во вагоните има рачни сопирачки во случај да им притребаат за да спречат тешка катастрофа.

Владата и по неколку недели откако вагони полни со патници излетаа од пругата кај населбата Чашка, се' уште ги чека извештаите за несреќите за да каже дали ќе побара одговорност и од кого.

Izvor: Dnevnik, http://www.dnevnik.com.mk/?ItemID=42A7032C183E354DB494EC36425202E9