Копии или оригинали во новиот археолошки музеј?

Приоритет на постановката е да се прикаже она што веќе го имаме како археолошко богатство, а дури потоа ќе се размислува за откупи и други начини на дополнување на збирката, вели директорот на Управата, Паско Кузман. Дали во новиот музеј ќе бидат изложени оригинали или копии на артефактите од заводите и музеите во Македонија, сé уште не се знае 

КАПИТАЛНИОТ ПРОЕКТ СЕ УШТЕ БЕЗ КОНЦЕПТ

Конечната концепција на постановката, како и изгледот на ентериерното уредување на галерискиот простор, кој ќе зафаќа вкупна површина од околу 6.000 квадратни метри, на новиот археолошки музеј сé уште не се знае. Набавката на витрините и на мебелот за музејот допрва ќе претстои, преку тендери и конкурси. Артефактите, пак, што ќе се најдат во овој музеј ќе бидат селектирани од збирките на археолошките музеи и заводи во Македонија, но сé уште постои дилемата дали ќе бидат изложени оригиналите или копии.

- Ако одлучиме во Скопје да ја донесеме, на пример, златната маска од Охрид, тогаш ќе треба да се направи нејзина квалитетна копија, која ќе остане во Охрид - вели директорот на Управата за заштита на културно наследство, Паско Кузман.

Според него, во новиот археолошки музеј, кој ќе биде сместен во новата зграда на левиот брег на Вардар, ќе биде конципирана сосема нова археолошка постановка.

- Таа ќе ги опфати најзначајните археолошки предмети на тлото на Македонија од палеолитскиот период, па сé до крајот на 15 век. Ќе имаме артефакти од праисторијата, антиката, од средновековието и тоа од словенскиот и византискиот период, заклучно со отоманскиот период - вели Кузман.

Акцентот на збирката ќе биде на капиталните археолошки зафати од последниве четири години: голем број златни, сребрени и бронзени предмети од најголемите локалитети - Исар Марвинци, некрополата кај Валандово, Стоби, Хераклеја Линкестис, Скопското кале...

Што се однесува до збогатувањето на оваа збирка со откупи или реституција на вредни артефакти, кои се наоѓаат во сопственост на странски институции или на приватни лица, Кузман вели дека тоа нема да биде приоритет на новиот археолошки музеј.

- Главната цел нема да ни биде откупот на артефакти. Секако, ако се појави некој исклучително вреден артефакт, ќе го откупиме и ќе го изложиме во рамки на збирката - вели тој и додава дека секоја година на археолошките наоѓалишта се ископуваат по 100 илјади предмети.

Изградбата на објектот на археолошкиот музеј се очекува да биде завршена до август, но терминот на отворањето на музејот, кој ќе биде сместен на првите три ката во зградата, заедно со Уставниот суд и Државниот архив, сé уште е неизвесен.

Во долните простории ќе бидат сместени депото и лапидариумот, односно епиграфски споменици и камени скулптури, меѓу кои и оние од пред Владата.

Новиот музеј ќе работи според современи музејски стандарди: услови во депоата, одредена температура, влажност...

- Археолошките артефакти можеби не се чувствителни на надворешните фактори, како иконите и живописот, но и ним треба да им се обезбедат соодветни услови за чување. Ова е особено значајно за сребрените предмети, кои потемнуваат доколку не се запазат тие стандарди, додека на бронзата „добро и стои“ и патината - нагласува Кузман.

Од овој музеј се очекува да биде значаен репрезент на археолошкото богатство на Македонија во пошироки рамки.

- Со оглед на фактот што некои археолошки откритија никогаш не се публикувани, светот малку знае за нашето археолошко богатство - категоричен е директорот на Управата.
До музејот ќе се стига преку пешачкиот мост, кој ќе биде изграден на реката Вардар, на кој ќе бидат поставени 28 помали скулптури.

Ќе се сели дел од Музејот на Македонија

Кон крајот на годинава археолошката постановка на Музејот на Македонија ќе се сели во новиот објект на археолошкиот музеј на кејот на Вардар. Стариот простор на оваа постановка ќе биде пренаменет во изложбен простор, посветен на децата-бегалци од Егејска Македонија.

Ќе добиеме ли копија од саркофагот со претстава на Александар ?!

Пред две години беше најавено дека Македонија ќе прави копија на мермерниот саркофаг со претстава на Александар Македонски од 4 век пред новата ера, кој се наоѓа во Археолошкиот музеј во Истанбул. Паско Кузман, директорот на Управата за заштита на културното наследство, е без коментар на прашањето дали и кога ќе се прави копијата на саркофагот и дали таа евентуално би била изложена во Археолошкиот музеј.
Саркофагот, кој е богато украсен со релјефна претстава на македонскиот војсководец, е пронајден во 19 век на некрополата блиску до либанскиот град Сидон. Изработката на копијата на овој значаен артефакт пред две години беше договорена помеѓу Паско Кузман и неговите колеги од Турција. Во таа пригода Кузман изјави:
- Копијата би имала идентични димензии со оригиналот и би била изложена во наш музеј. Тоа ни е заедничка желба. Нé врзува заедничкиот поим околу Македонија и Александар.