Хипериум

Компанијата „Хипо Алпе Адриа лизинг“ вчера почна да го гради луксузниот деловен центар „Хипериум“ во населбата Карпош, во близината на раскрсницата меѓу булеварите 8 Септември и Илинден. Комплексот ќе има пет ката над површината и два под земја, ќе се простира на вкупна површина од 13.000 квадратни метри и ќе се гради според европски стандарди. На првиот кат ќе се смести групацијата „Хипо“, а другите четири ќе се даваат на лизинг или ќе се издаваат.

Зградата ќе се состои од два дела, кои меѓусебно ќе се поврзат со внатрешни мостови. Од групацијата најавуваат дека во дворот пред влезот на овој луксузен објект ќе тече вештачка река, во приземјето ќе се направи фонтана, а во еден дел ќе има и ресторан за потребите на вработените во центарот. Зградата ќе има внатрешен лифт, а секоја канцеларија ќе содржи и своја конференциска сала за состаноци. Просториите ќе се прават со двојни подови, ќе бидат современо климатизирани и мрежно поврзани. Планирано е да се вградат и системи за заштеда на електричната енергија. „Хипериум“ ќе има и подземни гаражи и паркиралишта со капацитет за 200 возила. Во него ќе се пристапува од три контролирани влеза. Објектот ќе биде приспособен и за лица со посебни потреби.

- „Хипериум“ е демонстрација на нашата сериозност. Ова е прв чекор во воведувањето на лизингот на недвижнини. Тој е потребен и, во соработка со надлежните институции, ќе ги надминеме моменталните пречки и ќе го развиеме овој сегмент - истакна Ѓорѓе Војновиќ, член на управниот одбор на компанијата.

Интересни содржини се планираат за најгорниот кат, каде што меѓу другото треба да се направат отворена тераса и сала за фитнес.