Иако дури на крајот на месецов ќе се знае дали тендерот за изградба на македонско село ќе биде успешен, од Министерството за економија распишаа конкурс за избор на фирма што ќе врши надзор на изградбата

Приватната сопственост на земјиштето е една од причините поради кои не е изградено македонското село

Министерството за економија бара фирма што ќе врши надзор за изградба на македонското село, иако сé уште не е завршен конкурсот за избор на фирма што ќе го гради. Етноселото што е предвидено да се наоѓа до манастирскиот комплекс „Свети Пантелејмон“ досега требаше да се гради, па дури и да биде изградено и ставено во употреба. Изградбата на македонското село властите ја најавуваа уште од 2007 година, но тоа досега не е изградено затоа што пет илјади квадратни метри од земјиштето и припаѓаа на Македонската православна црква, па стручните служби на министерствата за економија, транспорт и врски, култура и финансии не можеа да се договорат кој да го организира откупот на земјиштето. Втората причина е тоа што општината Карпош на чија територија требаше да се гради со години не го усвојуваше деталниот урбанистички план. Од Министерството за економија тогаш објаснија дека кога ќе се решат сите проблеми ќе се распише конкурс за изведувач и за фирма што ќе врши надзор на изградбата. Но иако конкурсот за изведувач е сé уште во тек и дали е успешен ќе се знае на 31 овој месец, Министерството распиша конкурс за надзор. Заинтересираните фирми што планираат да учествуваат имаат уште неколку дена да ги испратат финансиските понуди и рокот до кога планираат да ги изградат македонските автентични куќички.

Од Министерството за економија објаснија дека не се сигурни дали тендерот за изведувач ќе биде успешен, но дури и да не се потпише договор со фирма-изведувач, тие ќе си имаат фирма за надзор.
- Договорите за надзор се потпишуваат врз основа на процент на понудата, но во случај да имаме неуспешен тендер за изведувачи, ние ќе потпишеме договор врз основа на проценетата вредност на проектот. Ако не избереме изведувач сега, наредниот пат нема да имаме потреба да распишуваме тендер за надзор - објаснија од Министерството за економија.

Автентичното македонско село ќе се гради на површина од 15.000 квадратни метри. Општината Карпош лани го усвои деталниот урбанистички план со кој се предвидени маркички за изградба на куќи со изглед од охридскиот, галичкиот, крушевскиот, малешевскиот и кратовскиот крај. Во комплексот е предвидено да има и ковачница, ткајачница, грнчарница, дуќани во кои ќе се прават бочви, меана, бакалница, фурна и анови во кои ќе може да се преноќува.