Доградба на НУБ

Новата зграда на Национална универзитетска библиотека „Свети Климент Охридски“ ќе биде готова до мај. Објектот е во завршна фаза, во моментот се работи фасадата, а потоа ќе се направат подовите и ентериерот. Директорот на библиотеката, Миле Бошевски, вели дека рокот од седум месеци, кој беше најавен за изградбата, бил пробиен поради дополнителни работи на теренот. Геомеханичките истражувања на земјиштето покажале дека основата мора да биде подлабока, па поради тоа девет метри од објектот морало да се изградат во земја. Во новиот дел од библиотеката ќе биде сместен центарот за дигитализација. Тој треба да биде современо опремен, со клима-уреди кои ќе овозможат чување на дигиталните форми. - Во нашиот центар услуги ќе може да користат и други институции за да ги дигитализираат своите изданија. За посетителите ќе има нови читалници, во кои ќе ги гледаат дигиталните форми на нашите изданија, а ќе имаат можност и да погледнат ретки дела од археографската збирка. Книги нема да се издаваат надвор од библиотеката, што беше правило и досега и“8211; вели Бошевски. Објектот се гради на површина од околу 3.000 квадратни метри со максимална висина до 17,5 метри. Во комплексот ќе има магацински простор, кој ќе зафаќа 700 квадратни метри и ќе биде во подземниот дел. Ќе се отворат депоа за специјалните и ретки изданија на библиотеката, посебен дел за дигитализација на сите библиотечни наслови и нови читалници. Паркирањето ќе биде партерно, а не во подземни гаражи, бидејќи во деталниот план за тој простор е предвидена изградба на катна гаража. Доградбата на националната библиотека чини околу милион и половина евра, а изведувач е фирмата „Бетон“. НУБ „Свети Климент Охридски“ е формирана во ноември 1944 година, во објектот на предвоениот Филозофски факултет во Скопје. Таа го наследила просторот на централната библиотека и таму ја почнала својата работа со 100.000 наслови, 12 вработени и само 50 читателски места. Осум години подоцна, кога Филозофски факултет бил преселен од зградата, таа е проширена и адаптирана. Денес има повеќе од три милиони библиотечни единици. Најстариот ракопис кој се чува во оваа институција потекнува од 13 век.

Slikata  gore e grda, izgleda ko da sme vo 19.vek