Интернет и телекомуникации

УШТЕ ДВЕ НЕДЕЛИ ЗА СТАРТ НА WIMAX

Nexkom и Cosmotelco се подготвени

Двата национални Wimax оператори во земјава - грчката компанија Cosmotelco и фирмата Nexkom Македонија имаат уште две недели да почнат на граѓаните да им ја нудат оваа услуга. И од двете компании вчера изјавија дека подготовките им се при крај и оти навреме ќе стартуваат со работа и тоа најпрво на териоријата на Скопје. Ако до 23 овој месец не почнат со работа, од Агенцијата за електронски комуникации (АЕК) велат дека ќе им ги одземат дозволите за работа. Wimax технологијата е хит во светот бидејќи овозможува безжичен и брз пренос на податоци (слика, говор, звук).
Од Nexkom вчера информираа дека интензивно работат на поставување на сопствена мрежа.

- Првите базни станици ги поставивме во Скопје и таму до крајот на јануари ќе почнеме со нудење на услугите. На почетокот тоа ќе биде на одреден број корисници, а потоа ќе биде покриен цел град. Паралелно ќе поставуваме базни станици и во другите градови. Очекуваме до јуни да ги опфатиме сите градови. Со оваа технологија ќе нудиме телефонски разговори и интернет без користење на класичните кабли, дури и на тешко достапни места - истакнуваат од Nexkom.

И од грчки Cosmotelco велат дека се при крај со подготовките за почеток на работењето. Оваа компанија целосно го има покриено Скопје со базни станици и 60 проценти од територијата на Македонија.
При потпишувањето на договорите со АЕК, од двете компании најавија дека во развој на Wimax мрежата ќе вложат значителни инвестиции - од Nexkom 10 милиони евра, а од Cosmotelco многу повеќе.

Очекувањата на Владата од работата на Wimax операторите (два национални и 18 регионални) се големи бидејќи треба да станат вистинска конкуренција на Македонски телекомуникации во делот на интернетот и фиксната телефонија. Wimax технологијата, дефинирана како Worldwide Interperability for Microwave Access или широкопојасен фиксен безжичен пристап, работи по принципот на базни станици како кај мобилната телефонија и затоа може да се пружа и на непристапни терени.

Оваа технологија функционира со пониски трошоци во споредба на жичаната врска со оптички кабли или бакарни жици како што користи Телеком при нудењето интернет пристап или фиксна телефонија. Услугите на Wimax фиксниот пристап корисниците ќе ги користат преку уред во својот дом кој ќе ги прима преку базните станици на операторот. На тој начин, операторите можат да покријат поголеми територии со само неколку базни станици, а корисниците да добиваат квалитетна слика. Поради тоа што Wimax технологијата е доста поевтина од класичното поставување на кабли, остануваат поголеми маржи за операторите, а тоа ќе резултира со пониска крајна цена на услугата. Според мислење на експертите, тоа ќе предизвика и конкуренцијата да почне да размислува за менување на ценовната политика во интернет услугите и фиксните разговори, односно нивно намалување.

Телеком досега се обидуваше да ја опструира конкуренцијата во фиксната телефонија затоа што сите оние што пробаа на овој пазар беа зависни од неговата мрежа, односно од цените што ги диктираше преку интерконекциските договори. Со Wimax технологијата тоа нема да биде случај бидејќи станува збор за сосема независна мрежа од онаа на Телекомот.

http://vecer.com.mk