Аеродроми

Александар Велики остана без превоз

Турската компанија ТАВ сака да ангажира своја блиска фирма што ќе воведе директна автобуска линија, но само ако се покаже исплатливо

Неизвесно е дали аеродромот „Александар Велики“ ќе добие директна автобуска линија со центарот на градот и откако турската компанија ТАВ го презеде управувањето. Компанијата сака да си ангажира турска фирма што ќе ги превезува патниците, но само ако е економски исплатливо. Од друга страна, ЈСП „Скопје“ потешко ќе влезе во игра за превоз до аеродромот оти нема соодветни услови за тоа.

Ниту иницијативата на ЛДП што неодамна ја усвои Советот на Град Скопје за воведување автобуска линија до „Александар Велики“ не е гаранција дека тоа ќе се случи. Советот ги задолжи градоначалникот Коце Трајановски и ЈСП итно да ги почнат потребните активности, затоа што, како што се велеше во иницијативата, Скопје остана еден од ретките градови во Европа, ако не и единствен во кој не постои јавен превоз до аеродромот. Советникот Зоран Шапуриќ во иницијативата побара автобусите да се воведат во рок од 30 дена и да возат на линијата неколку пати дневно, според распоредот на полетување и слетување на авионите.

Директорот на ЈСП, Мишо Николов, вели дека пред една недела имале средба со претставници од ТАВ.

- Тие не' информираа дека директна автобуска линија до аеродромот ќе и' доделат исто така на фирма од Турција со која соработуваат. Фирмата изработува физибилити-студија за економската оправданост на ваква линија. За еден месец треба да бидеме известени што понатаму. Ако оваа фирма се откаже од воведувањето на линијата, ние ќе бидеме земени предвид - изјави Николов.

Тој истакна дека ако сепак ЈСП вози до аеродромот, би се вовела приградска линија, бидејќи според Законот за безбедност на патиштата, автобус за јавен градски превоз не смее да се движи по автопат. Тогаш автобусот би се движел по приградските населби што гравитираат кон селото Петровец.

- Не знам колку би било во ред изморени патници со багаж од аеродромот да се возат со автобусот низ толку населби до центарот и да чекаат на сите попатни станици. Се работи за долга релација од 20 километри. Тоа е малтретирање - објаснува Николов.

Тој вели дека ваква приградска линија постоела пред осум години, но поради премалиот број патници што ја користеле, била укината.

- Како ЈСП сакаме директна линија до аеродромот. Автобусот би ги собирал патниците од пред неколку хотели како што се „Александар палас“, „Холидеј ин“, „Континентал“, и би ги носел директно до аеродромот - истакна Николов.

Во Градот велат дека градоначалникот Коце Трајановски го задолжил ЈСП да покрене иницијатива до Министерството за транспорт и врски за воведување редовна автобуска линија до аеродромот, а за резултатите од иницијативата да го известат Советот на Град Скопје во рок од 30 дена.

Од ТАВ информираа дека активно се работи на иницијативата.

- Мора прво да се утврди дали во зависност од заинтересираниот број патници ќе биде оправдано да се воведе ваква линија. Се работи на студијата. Не сме се откажале од спроведување на иницијативата, бидејќи оваа линија ни е во приоритетите - децидни се од ТАВ.

Додека се решат овие дилеми, аеродромот останува без организиран превоз, а единствен избор на патниците им се или роднините или таксистите, кои често знаат „солено“ да им го наплатат возењето.