Кругови кои наликуваат на влага повеќе од една недела се декор на дел од мармерната фасада на музејскиот комплекс „Македонска борба“ во кои ќе биде сместен музејот на ВМРО и на жртвите на комунизмот.
Која е причината за појава на флеки на предниот дел на фасадата што се обложува со плочи од мермер „сивец“, засега останува енигма, бидејќи за да се добие каков било одговор во врска со градбите од проектот „Скопје 2014“ е вистинска голгота.
Музејскиот комплекс се гради на површина од 2.500 квадратни метри. Од нив 1.700 квадратни метри се предвидени за Музејот на ВМРО, а 800 квадратни метри за Музејот на жртвите од комунизмот.
За изградба на зградата Министреството за култура потроши 4 милиони евра, но подоцна сумата беше надополнета со уште 1.2 милиони евра преку четири анекси на договорот за непредвидени работи.
За внатрешноста на музејот, односно за масовните сцени од домашни, руски, украински и бугарски автори беа потрошени околу 1 милион евра, за рамки за слики повеќе од 100.000 евра. За 105 восочни фигури се исплатени околу 1.5 милиони евра. Проектот за мебел изнесуваше околу 200.000 евра, а мебелот повеќе од 818.000 евра. За осветлувањето на објектот беа дадени 220.000 евра, а за витраж 420.000 евра. Со последниот тендер за уредување на ентериерот кој изнесуваше 2.3 милиони евра се постигна конечната сума од речиси 12 милиони евра.

 ГМВ/ВЃ