Ребалансот нема да ги запре капиталните проекти

Амбициозни проекти во трка за влез во буџетот за 2011

Вредноста на желбите е речиси двојно поголема од планираниот прилив на пари за идната година

Сања Наумовска

Охрид - Градска куќа, булевари, мостови, подобрување на јавниот сообраќај и на хигиената во градот, катни гаражи, но и смели размислувања за сообраќајници на две нивоа на неколку раскрсници, се некои од проектите кои ќе си го бараат својот дел од колачот при планирањето на градскиот буџет за 2011 година. Советниците во Советот на Скопје и градоначалникот Коце Трајановски, без присуство на колегите од опозицискиот СДСМ, пред да одлучуваат за големината на идниот буџет, викендов во Охрид ги сослушаа плановите за идната година на градската администрација, јавните претпријатија и на културните институции.

Желбите за 2011 година тежат 4,5 милијарди денари, но веројатно ќе треба да се стиснат во рамките на проектираните приходи за в година, кои, според пресметките на Секторот за финансии, нема да преминат 2,52 милијарди денари. Според зборовите на градоначалникот Трајановски, до крајот на септември во градската каса се слеале над 2 милијарди денари, што дава надеж дека идната година ќе има пари за повеќето од планираните проекти. Се разбира, вели Трајановски, предност ќе добијат веќе почнатите проекти, како што е булеварот „Србија“, но ќе се отвораат и нови фронтови, особено во насока на подобрување на сообраќајната мрежа.

Високо на агендата на градската администрација е и изградбата на градската куќа, но засега никој отворено не зборува за локацијата. Трајановски потврдува дека има проект што Градот го платил четири милиони денари, но се' уште размислува за најсоодветната локација. Повеќе години како можен дом на Градот Скопје во игра беа Старата железничка станица, локацијата во парк каде што се наоѓаат градските бараки, како и административната зграда на „Рубин кармин“ на Кале. Според проекциите на Градот, градската куќа би чинела околу десет милиони евра.

„Идната година почнува проширувањето на ’Првомајска‘ од Стара рампа до Расадник, а ако има пари ќе продолжи и на други делници од сообраќајницата“, вели Трајановски. Уште две ленти и кружен тек кај Католичка црква ќе добие и улицата „Теодосиј Гологанов“. Веќе е направен проект за делот од „Нова Македонија“ до „Рузвелтова“, а идната година ќе се проектира и делницата до студентскиот дом „Гоце Делчев“. Од еден до еден и пол милиони евра ќе го чини Градот Скопје и мостот во Сарај, кој треба да почне да се гради кон крајот на годинава или во јануари. Пари за него, околу 30 милиони денари, се очекуваат и од централниот буџет.

„Раскрсниците кај Црвен Крст и ’Нова Македонија‘ се зрели за решение на две нивоа, со кое ќе се обезбеди поголем проток на возила. Веќе имаме разгледано повеќе вакви искуства од други градови, но нивната реализација кај нас, пред се', ќе зависи од подземната инфраструктура“, објаснува Трајановски.

Подобрувањето на јавниот превоз, паралелно со очекувањето на новите автобуси за ЈСП, ќе се решава со автоматско следење на возилата и воведување на смарт-тикетингот. Со кредит ќе се опремува и центарот за управување на сообраќајот, за кој градоначалникот Трајановски смета дека е краен момент да почне со работа. До 2012 година ќе треба да се изградат и двете градски катни гаражи, кои ќе го чинат Градот околу осум милиони евра. Парите ќе се обезбедат од кредити, а ќе се враќаат со продажба на деловниот простор.

Новина во Скопје ќе биде и првиот паркинг за тешки возила, кој ќе се гради под Транспортниот центар, крај кејот на Вардар. За паркиралиштето кое треба да го реши проблемот на меѓуградските автобуси и камионите се планираат 14 милиони денари.

http://utrinski.com.mk/?ItemID=7BE0D87DC30FB54BB578CBC881C91F0D

Трајановски ќе го асфалтира целиот центар

Нова градска куќа, две катни гаражи во центарот, проширување на Теодосиј Гологанов со уште две ленти, на Првомајска, целосна реконструкција на коловозните ленти на сите улици во Малиот и Големиот ринг - тоа се дел од приоритетите на градската власт на Скопје за наредната година, беше кажано на презентација на Буџетот за 2011 година што викендов се одржа во Охрид.

- За градската куќа ќе се подготви документација и ќе се изработува проект, а ако се најдат пари, администрацијата по пет децении ќе се пресели од бараките во Градски парк во нов објект - рече градоначалникот Коце Трајановски.

Катните гаражи ќе се градат со кредити, а уште при изградбата ќе се продава деловен простор, со цел да се обезбедат пари. Многу од проектите што беа изложени се од изминатите години, но бидејќи за нив немаше пари, беа одложени за 2011 година: нов мост во Сарај, воведување еден билет за возење во јавниот и во приватниот градски превоз (т.н. „смарт тикетинг“), како и автоматско лоцирање на автобусите, со цел да се знае времето и местото на нивно движење. Трајановски се задржа на купување нови возила за „Комунална хигиена“ како приоритет за подигнување на јавната чистота во метрополата.

- Наскоро ќе стасаат шест камиони, а за некое време ќе распишеме тендер за уште 20. Се' на се', до мај 2011 година сметаме да дојдеме до 50 камиони, што за нас ќе биде успех. Тогаш на 10.000 жители ќе има еден камион, а не како претходно, кога на 100.000 жители имаше само едно возило за подигање на ѓубрето - објасни скопскиот градоначалник.

Освен овие предлози, кои беа презентирани и се очекува да влезат во Буџетот за 2011 година, имаше и дополнителни, од директорите на јавните претпријатија и од членовите на Советот, па затоа и листата за Буџетот не е конечна. Според Трајановски, од неделава ќе се врши дополнителна селекција на најважните работи за кои треба да се издвојат пари. Во секој случај, извесно е дека до крајот на годинава или во јануари наредната ќе почне да се гради нов мост во Сарај, со две ленти. Би чинел 1,5 милион евра, предвидено е дел да даде Владата, а дел градската власт.

Скап проект, за кој се потребни 3 милиони евра, а ќе се обезбедат од кредити, е изградбата на Центарот за управување и контрола на сообраќајот. Со негово воведување ќе биде овозможено на раскрсниците возилата автоматски да се бројат и пропуштаат, а воедно и ефикасно да се регулира зелениот бран, без разлика на негово вклучување или исклучување од полицијата при пропуштање делегации и владини возила.

На презентацијата на Предлог-буџетот присуствуваа раководители на градските сектори, директорите на јавните претпријатија, како и сите членови на Советот, освен од советничката група на СДСМ. Координаторот Софија Куновска, рече дека и во јуни годинава имало идеја за патување во Охрид заради ребаланс на Буџетот, но дека и тогаш од советничката група изразиле негодување, а Трајановски ја одложил посетата. Таа ги потенцира економската криза и слабиот градски Буџет како причини за бојкот на оваа посета. Кажа дека лани разгледувањето на Буџетот се одржало во Маврово, а според нив, не дало особено резултати.

- Наше мислење е дека истата оваа дебата можеше да се случи и во Скопје, на седница на Совет, во обичен работен ден, без ручеци и трошоци за хотелски аранжмани - изјави Куновска.

Проект, кој беше споменат на презентацијата, за кој ќе се бараат пари, се раскрсници на две нивоа, кај Црвениот крст и кај Нова Македонија. Градоначалникот Трајановски објасни дека сериозно размислува сообраќајот на овие локации да го растоварува со денивелирани улици, една надземна и друга подземна.

Градската власт годинава остварила најголем број приходи од воведувањето на децентрализацијата, околу 34 милиони евра, а до крајот на годинава се очекува да стаса до 40 милиони. Наредната очекуваат поголем прилив од даноци и од други извори, односно околу 50 милиони евра.

http://dnevnik.com.mk/?ItemID=523F45BE0D824546A3421B6A8AEF86D1