Министерство за надворешни работи

Изградбата ќе трае 18 месеци, а Владата за тоа планира да потроши 12 милиони евра

Деспина Трајковска 


Седумкатница во барокен стил на левиот брег на Вардар пред зградата на Македонската опера и балет од идната година ќе биде постојаниот дом на Министерството за надворешни работи. На теренот веќе се вршат подготвителните работи за почеток на градежните работи на објектот за кој Владата планира да потроши 12 милиони евра. Продавачите на стари книги, кои неколку години го користеа овој простор, веќе се дислоцирани на десната страна на реката Вардар, а „исчистената“ парцела деновиве почна да се оградува. 

Васил Доневски, директор на владината Служба за општи и заеднички работи, вели дека наскоро се очекува официјалниот старт на изградбата. Речиси се' е подготвено за камен-темелникот, што ќе го постави премиерот Никола Груевски, како и за останатите објекти од околината. 

„Обезбедена е градежната дозвола, а екипите на изведувачот ‘Бетон‘ веќе вршат подготовки на терен. Објектот ќе се гради по избраното идејно решение на авторите Благоја и Лидија Стојановски, кои инаку се татко и ќерка. Рокот за изградба е 18 месеци. И овој објект, како и останатите што се градат и оние планирани допрва да се изградат, ќе бидат стилски. Конкретно, оваа зграда ќе биде во барокен стил“, рече за „Утрински весник“ Доневски.

Тој вчера не беше во можност да го приложи изгледот на објектот, но вети дека ќе го стори тоа идната недела. Зградата ќе има приземје и седум ката и ќе се простира на површина од околу 13.500 квадратни метри. 

Изградбата на седумкатницата ќе значи конечно и постојана адреса за Министерството за надворешни работи. Неговите вработени со години се кираџии во неколку објекти, а немањето соодветен сопствен простор, како што неколкупати досега потенцираа, особено доаѓа до израз при посети на странски делегации и претставници на дипломатскиот кор. Сега Министерството користи канцеларии во зграда на улицата „Даме Груев“, која ја дели со Државниот завод за статистика и во неа се сместени околу двесте вработени. 

Инаку, идејата за изградба на нов објект за МНР е стара повеќе години, а нејзината реализација се овозможи со неодамнешните измени на урбанистичкиот план „Мал ринг“. Со нив, освен МНР, на брегот на Вардар ќе се наоѓа и нова зграда за уставните судии, која веќе се гради, како и заеднички објект за потребите на Јавното обвинителство и Финансиската полиција. Нивни соседи во друг објект ќе бидат и други административци, кои -- се' уште не е познато.

http://www.utrinski.com.mk/?ItemID=EE169204599D3147B2A0E9A647A4893A