Скопски сообраќај (општо)

Роза Петкова

Улицата Васил Ѓорѓов која минува покрај Агенцијата за вработување повторно ќе се асфалтира затоа што градоначалникот Владимир Тодоровиќ не е задоволен како е завршена реконструкцијата. Првиот човек на општина Центар ова го соопшти пред советниците на седница, на која дел од нив побараа објаснување зошто улицата со месеци стои необележена, иако асфалтирањето одамна заврши. - Обележан е само потегот на крстосницата со Водњанска затоа што овој дел го проширувавме и мораше да се исцрта сигнализацијата. Понатаму, улицата не е обележена поради тоа што е лошо изведена. Добивме крпена улица, на неколку локации се собира водата од дождовите, неколку шахти не се изведени како што треба. И покрај тоа што изградбата имаше надзор и квалификувана фирма со лиценца, сепак, јас, како инвеститор, не сум задоволен од изведбата и нема да потпишам дека ја примам улицата вака направена - рече Тодоровиќ. Тој смета дека засега е подобро да се почека да помине зимскиот период, па од март улицата повторно да се изгребе и да се асфалтира. Васил Ѓорѓов почна да се реконструира летово. Општината прво ангажираше фирма за да постави атмосферска канализација, а дури подоцна објави дека, всушност, целата улица ќе се обновува. Работите со прекини траеја и во септември и во октомври, а граѓаните реагираа за метежот и за тоа што мораа да возат по изгребаниот коловоз. Според општинските власти, на Васил Ѓорѓов се изгради атмосферска канализација во должина од 300 метри, на потегот од крстосницата со улицата Водњанска до поранешната дирекција на „Жито лукс“. Коловозот се реконструираше до стариот трговски центар „Капиштец“. Беше кажано и дека тротоарите ќе се поплочат со павер-елементи во должина од 370 метри, но засега на пешачките патеки не се работи. Улицата, исто така, доби уште две нови ленти пред приклучокот со Водњанска за делумно да се намали сообраќајниот метеж. Реконструкцијата е заедничка инвестиција на Општината и на Град Скопје, кои по половина ќе ја платат вкупната сума од околу шест милиони денари. На терен работеа фирмите „Беграмо“ и „Бауер“, од кои првата ја поставуваше атмосферската канализација, а втората беше задолжена за коловозот.

http://vreme.com.mk/DesktopDefault.aspx?tabindex=1&tabid=1&EditionID=2183&ArticleID=152637