Сончев Град

Опозицијата се плаши од сеча на Водно

Парк-шумата Водно ќе се копа со цел да се истражи дали и на кое место може да се изгради улица што ќе го поврзува Скопје со Сончев град во Сопиште, населба што допрва треба да никне на јужната страна на планината, обвини вчера опозицијата на седницата на Советот на Скопје.По жестоката дискусија со владејачкото мнозинство на ВМРО-ДПМНЕ, салата во текот на седницата ја напуштија незадоволните советници од коалицијата на СДСМ и ЛДП, како и од ЛП. Опозицијата обвини дека мнозинството сака заклучокот да го протне на мала врата, со цел да почне уништувањето на Водно. Иако бараа да им се достават материјали, согласности од секторите во градот задолжени за парк-шумата, образложение која е целта на испитувањата, барањата не им беа исполнети.

- Ова е почеток на сечата на Водно. Не знаеме која е целта на испитувањата. Не е кажано дали ќе се бара нафта, вода или, пак, целта е изградба на улица. Точката треба да се одложи за да добиеме материјали и јавноста да увиди за што станува збор - смета Ивон Величковски од Либералната партија.

Софија Куновска од СДСМ изрази сомневање во законитоста на постапката, но потенцираше дека и овој заклучок веројатно ќе добие согласност од мнозинството, како и за останатите проекти за кои инсистираше владејачката партија како што беа споменикот на Скендербег, Генералниот план на Скопје, планот за Мал ринг...

Претставник од Секторот за екологија при Градот изјави дека шумата е во нивна надлежност, но дека согласност не дале ниту тие ниту „Паркови и зеленило“ за какви било истражувања.

- Има одлуки што се во сила за заштита на парк-шумата и со нив не е дозволена каква и да е изградба. Со нив се забранува каква била активност или сообраќај што може да ги уништи шумата и живиот свет во оваа заштитена зона. Дури имаме во план рампата на сегашната улица на Водно да ја спуштиме подолу, со цел да се ограничи и сегашниот сообраќај. Ставот на Градот е доставен и до сите државни институции, но досега одговор не сме добиле - објаснија од Секторот за екологија.Тие потенцираа дека од сопствениците на градбите што се наоѓаат на Водно постојано добиваат барања за изградба на пристапни улици до нивните објекти, но тие редовно ги одбиваат.

- Ако се усвои овој заклучок, не знам како утре ќе им објасниме зошто да не се гради улица и за нив - рече претставникот од Секторот за екологија.

Дискусијата кулминираше кога дојде на ред гласањето. Опозицијата, која ја напушти салата, тврдеше дека нема кворум за гласање, односно дека во салата се присутни 22 члена на Советот. Наспроти нив, службите и претседателката Ирена Мишева заклучокот го усвоија со тврдење дека за него гласале 24 советници. Опозицијата ќе побара од градоначалникот Трифун Костовски да не го потпишува заклучокот за геотехнички испитувања на Водно, со образложение дека Мишева го прекршила Деловникот.

Ребалансот на буџетот сепак помина

Иако во минатата недела градските советници го одложија усвојувањето на ребалансот на буџетот предложен од градоначалникот Трифун Костовски, и со тоа ги блокираа најавените проекти, вчера оваа точка беше ставена на дневен ред, а ребалансот на Буџетот за 2008 година беше усвоен. Со амандман, сумата дури беше дополнета за 10 милиони, па сега вкупно 150 милиони денари ќе се инвестираат за спас на ЈСП од колапс, за изградба на плоштад под црквата „Света Богородица“, за уредување на кејот Димитар „Влахов, за нови улици, осветление и за нов пешачки мост до пештерите на Матка. Околу 200.000 денари ќе им бидат доделени на спортистите што учествуваа на Олимпијадата во Пекинг.

http://dnevnik.com.mk/?ItemID=A2DF8BCD0DD0964EBD88D3B288444185

Екологистите не даваат да се гради пат за Сончевград преку Водно

Трасата не е дефинитивно утврдена, но би требало да биде долга околу три километри

Сања Наумовска

Еколошките невладини организации ќе ја бранат Парк-шумата „Водно“ и нема да дозволат да се сечат дрвјата, доколку треба низ неа да се гради пат до Сончевград. По завчерашната одлука на Советот на Скопје да и' се одобрат на Агенцијата за патишта геомеханички испитувања на теренот, зелените организации во главниот град, поддржани од планинарските друштва, започнале да ги разгледуваат опциите што им стојат на располагање за заштита на белите дробови на Скопје. Првенствено, тоа се законите и одлуките кои го штитат Водно како заштитена зона, но не се исклучува ниту радикалната мерка - протест со затворање на патот кон Средно Водно.

Според плановите за изградба на елитната населба Сончевград, патот треба да ги поврзува Средно Водно и селата Сопиште и Долно Соње. Трасата не е дефинитивно утврдена, но би требало приближно да биде долга околу три километри. Инвестицијата за изградба на овој пат, според првичните процени, треба да изнесува 700 илјади евра.

„Одлуката на Советот на Скопје се' уште е нова и не сме ја разгледале детаљно, но сепак, не се согласуваме и секако ќе реагираме. Градот Скопје беше последната институција која не' поддржуваше во нашите напори за заштита на Водно и се надеваме дека така ќе остане. Во текот на следните денови со другите организации и друштва ќе го подготвиме нашиот одговор на одлуката“, вели Петар Бошевски од „Екомисија“.

Во Агенцијата за патишта потврдуваат дека со одлуката на Советот на Скопје се отвора можност да се изработи проект за патот кон Сончевград. Геомеханичките испитувања се подготвителна фаза во која ќе се снима и испитува почвата каде што би поминувала трасата. Без испитувањата кои ќе започнат веднаш кога Агенцијата официјално ќе го добие одобрението од Советот, не може да се изготви идеен проект. За нив тоа е регуларна процедура, без разлика што се однесува за парк-шума.

„Во рамките на испитувањата треба да се утврди трасата на патот кон Сончевград, што не значи дека во текот на процедурата не може да се утврди и дека патот не треба да поминува таму. Затоа и е предвидена таа подготвителна фаза“, вели Катерина Панова-Илиевска, портпаролка на Агенцијата за патишта.

http://utrinski.com.mk/?ItemID=0E35F7F93C372143AD8CB32D4EA80188