Кучиња скитници

Куманово ги ретчи кучињата-скитници

Елена Вељановска

Поради зголемениот број кучиња скитници Град Скопје одлучи да вработи 23 нови работници во стационарот „Вардариште“. Тие имаат задача да ги ловат бездомните кучиња, да ги транспортираат од местото каде што се фатени до стационарот. Откако ќе бидат стерилизирани и исчистени од паразити бездомните животни, според планот, ќе бидат вратени на местото од кое биле земени . Новите скопски шинтери ќе имаат задача и да ги чистат мршите на животните од јавните површини низ градот.
Новите вработени ќе бидат ангажирани од Агенцијата за вработување на Македонија, а за нив е предвидено месечно да се издвојуваат средства во висина од 300 евра за вработен, а вработувањето ќе трае шест месеци.
Од Град Скопје велат дека во овој период од годината се јавува реална потреба за зголемување на бројот на вработените во стационарот „Вардариште“, со цел да се одржи предвидената динамика во програмата за бездомни животни „Фати, стерилизирај, врати“. Како дополнителна причина за донесување на одлуката за нови вработувања се наведува и зголемувањето на опасноста од инфекции, кои се јавуваат поради високите температури и како последица на забрзаното разградување на мршите од животните за чиешто отстранување, како што велат, мора да се дејствува што е можно побрзо.
- Во согласност со предвидената програма за оваа година е предвидено да бидат фатени од 7.000 до 15.000 бездомни кучиња, кои треба да се третираат во „Вардариште“. Од проценетиот број единки за оваа година се предвидува да се ловат од 300 до 400 кучиња месечно - информираат од Град Скопје.
Сепак, и покрај ваквите сезонски вработувања со кои се зголемува бројот шинтерите, кои ги ловат бездомните животни и ги собираат мршите од улиците на главниот град, сепак, според надлежните, проблемот со овие животни е многу тешко да се реши, првенствено затоа што истите по стерилизацијата повторно се враќаат на местото од кое се земени, наместо да бидат посвоени од страна на заинтересирани граѓани. Според надлежните од „Комунална хигиена“ бројката на дваесетина посвоени животни месечно е поразителна во споредба со неколкуте стотици кучиња, кои повторно се враќаат на улиците.