Градскиот парк ќе се наводнува од нови бунари

И годинава за полевање на најголем дел од
зелените површини се троши пивка вода место техничка

Зелените површини во градов се' уште се полеваат со пивка вода, место со техничка. Одамна најавуваната идеја за изградба на бунари, чија вода ќе се користи за полевање на парковските површини, бавно се реализира и освен двата бунара во Јане Сандански други не се ископани.

Од Одделението за односи со јавноста тврдат дека Градот работи на проекти за изградба на бунари во Градскиот парк. Деталите за нивните технички карактеристики сега не ги соопштуваат, велат дека ќе ги изнесат на промоција на проектот, која треба да се одржи многу бргу. Само потенцираат дека е во тек изведба на седум бунари и тоа два бунара во првиот дел од Градскиот парк и пет во вториот. Според информациите оттаму, моментно се работи на ископување и на бетонирање на бунарите, додека кај некои веќе се вградува и потребната инсталација.

Од Градот велат дека со изградбата на бунари во Градскиот парк долгорочно ќе се реши употребата на техничка вода за полевање на големите зелени површини. Од овие бунари ќе се полеваат околу 190 илјади квадратни метри зеленило само во двата дела од паркот.

Засега од бунарски води се наводнуваат само зелените површини во општина Аеродром. Поради присуство на подземни води во паркот „Чаир“, Општината многу одамна најавуваше ископување на бунари, но досега не е направено тоа.

Авни Калаба, одговорен за информирање во Чаир, вели дека идејата да се ископаат бунари е оправдана од аспект на штедење на пивката вода. За општина како што е Чаир, која располага со многу зеленило, ова ќе биде ефикасно решение за штедење на водата за пиење. (Сн.К.)

Зеленилото во Аеродром и во Карпош ќе се полева од нови бунари

Општина Аеродром привршува со изградба на 10 нови подземни бунари за наводнување на зелените површини, а исто толку бунари наскоро ќе почнат да градат општинарите од Карпош. И во двете општини проектите се реализираат со цел наместо со пивка вода, зелените површини да се наводнуваат со техничка вода. Бунарите што се градат во Аеродром ќе се користат за полевање на зеленилото во населбите Мичурин, Реонски центар и делови во Лисиче. Неколку бунари ќе се градат и во близина на мостот „Близнак“, кој ќе се користи за паркот во непосредна близина.

На подрачјето на Општина Карпош, пак, десет бунари ќе се градат за потребите на зеленилото покрај булеварот „Партизански одреди“. Градоначалникот Стевчо Јакимовски информира дека проектите за бунарите се готови, а општината веќе обезбедила и средства за нивна реализација.

„На подрачјето на Карпош се неопходни речиси 100 бунари за да се задоволат минималните потреби. Годинава планираме да изградиме 10 бунари што ќе се користат за зеленилото покрај булеварот, односно на потегот од Карпош 1 до Карпош 4, а в година уште дваесетина што би се користеле за зеленилата меѓу станбените блокови“, најави Јакимовски.

Инаку изградбата на бунарите не само во Карпош и во Аеродром туку низ сите општини воопшто беше тема и на последната координација на градоначалниците. Надлежните констатираа дека е неопходно да се покрие поголемиот дел од зелените реони во градот со бунари, а за нивно полевање да се користи техничка вода, а не вода за пиење.

Почна изградбата на водоводот во Патишка Река

Стартуваше изградбата на водоводот во Патишка Река, инвестиција вредна околу 4,5 милиони евра. Дел од овие средства се обезбедени од Европската банка. Проектот е на Општина Сопиште, а ќе го реши водоснабдувањето на околу 10 илјади жители.

Градежните машини на главниот изведувач на работите, градежната фирма „Конти-хидропласт“ од Гевгелија, вчера работеле во придружба на полицијата, која внимавала да не дојде до евентуални инциденти од страна на месното население. Дотолку повеќе што лани тоа беше категорично против изградбата и со протести го спречуваше градењето на водоводот. Според градоначалникот на Сопиште, Јован Ѓорѓиоски, инциденти или какви било реакции од мештаните вчера немало. Претходните тензични состојби биле решени откако на жителите од Патишка Река им биле исполнети барањата да се поправи училишниот објект, да им се изгради спортско игралиште, а неодмана ги посетил и министерот за здравство, кој им ветил и изградба на месна амбуланта. Општината обезбедила и 22 милиона денари за изградба на фекална канализација во Патишка Река.

Вчера стартуваа градежните работи од примарниот дел на водоводот, кој ќе се реализира во три фази. Првата има должина од 9 километри, а водоводот ќе се протега од Патишка Река до патот кон селото Држилово. Реализацијата на првата фаза ќе чини еден милион евра.

„Каналите се веќе ископани и ќе треба да се постават цевките, а паралелно можеби ќе се одвива и втората фаза, со траса од селото Држилово до Јаболце. Од ова село водоводот ќе продолжи до Света Петка, Барово, Чифлик, Долно и Горно Соње. Целокупната должина на водоводот ќе изнесува 23 километри“, вели градоначалникот Ѓорѓиоски. (Сн.К.)

Се реконструира браната на Црн Дрим

Почна реконструкцијата на браната што го регулира истекот на водата од Охридско Езеро кај Црн Дрим. Нови бетонски конструкции ќе ги заменат дрвените врати кои се дотраени и гнили. Ќе се реконструира и мостот над испустните врати, но тој ќе остане дрвен заради неговата автентичност

Нов зафат за вода тече во Вруток

Наместо довршување на пречистителната станица во Здуње, таков објект за снабдување со вода за пиење на 60.000 жители на општина Гостивар ќе се гради во близина на хидроцентралата во селото Вруток, бидејќи новото решение било поефикасно и поевтино

Наместо довршување на фабриката за вода во селото Здуње, ќе се гради нов објект за пречистување во Вруток. Потврдата за измена на првичниот план со кој ќе се надминат проблемите со обезбедување чиста вода за пиење во гостиварската општина, доаѓа од Неџати Јакупи, министер за животна средина и просторно планирање.

Новиот објект треба да се гради во непосредна близина на хидроцентралата Вруток. Земјиштето било купено пред повеќе од две децении за потребите на тогашното претпријатие „Водовод“. Студијата за новото решение која ја нарачало Министерството покажала поголема оправданост во споредба со планот да се доврши почнатата филтер-станица. Јакупи за „Дневник“ изјави дека веќе е отпочната првата фаза за реализација на овој зафат.

- Во моментов се работи на подготовка на првиот јавен повик од проектната фаза. Се обезбедува потребната документација, како што се имотни листови, катастарски подлоги и услови за градба. До крајот на годината ќе го објавиме и првиот јавен повик - вели министерот Јакупи.

Како клучна причина за изборот, пречистителната станица да биде во Вруток во близина на изворот на Вардар, од каде што со вода се снабдува гостиварскиот водовод, Јакупи го посочува покусиот рок за реализација. Освен тоа, како што вели, истиот ефект ќе се постигне со помалку пари.

- Процените укажаа дека довршувањето на филтер-станицата во Здуње е прескапа инвестиција и не нуди долгорочно решение, а реализација би траела многу подолго. Додека, новиот проект целосно би бил реализиран за помалку од една и пол година - нагласува Јакупи.

По првата фаза која опфаќа проектни активности, напролет треба да следува и втората фаза односно изведбената. Замислата е да се изгради објект на земјиште кое веќе е откупено. Во непосредна близина минуваат главните цевководи кои водат до градот. Како важен детаљ е и вградувањето на најнова технологија за пречистување на водата, која ќе штити од заматувањата на кој е подложен изворот на Вардар. Дел од објектите, особено резервоарите во селото Здуње ќе бидат искористени и ставени во функција.

Филтер-станицата за градскиот водовод е неопходна бидејќи водата во водоводот се слева без да се пречистува или да се таложи. Заради таквата состојба, гостиварци при секое заматување не може да ја користат водата за пиење со месеци. Така беше и пролетва.

Владата преку ресорните министерства најави надминување на проблемот, но работите се одолжија. Планот беше на постојната локација во селото Здуње, да се доврши објектот кој почна да се гради пред дваесетина години и во него се смести технолошко-машинскиот дел и лабораторијата.

Гостиварскиот градоначалник Руфи Османи јавно ја прозва Владата дека не посветува внимание на проблемот со кој се соочуваат околу 60.000 гостиварци. Тој, најави дека со самопридонес на граѓаните ќе се финансира довршувањето на пречистителната станица во Здуње.

- Новиот проект, што го застапува министерот за екологија, навистина е поевтин, но според анализите на стручните лица во ЈП „Комуналец“, не го решава проблемот во целост. Неколку населби со 15-ина илјади жители нема да бидат опслужени со пречистена вода - вели Османи.

На граѓаните им е сеедно каде ќе биде, поважно им е кога ќе ја добијат потребната станица за пречистување. Важно им е бидејќи не мора да стравуваат од ново заматување при секои пообилни врнежи од дожд. Годинава, поради заматувањето на изворот на Вардар гостиварци половина година жедта ја гаснеа со цистерни, пакувана и вода од бунари и од околните водоводи.

Заврши ревизијата на проектот за Конска река

Гевгелија, 31. јануари 2011 (ИНПРЕС)
извор: Инпрес фото: архива

Според извршената ревизија на основниот проект, изградбата на Конска брана ќе чини 33 милиони евра. Ревизијата е направена од страна на фирмата „Хидроенерго инжинеринг", по распишаниот тендер од страна на ГТЗ.

Ревизијата на проектот беше предвидена во Приоритетната програма за Центарот за развој на Југоисточниот развоен регион. Покрај ова, во тек е реновирањето на проектот од страна на Градежниот институт на Македонија, кој понуди најповолна понуда на распишаниот тендер од страна на Министерството за економија.