Најфреквентната дебармаалска улица, "Ленинова", е речиси непроодна и за автомобили и за пешаци. Терасите на кафулињата се протегаат до самиот крај на тротоарите, автомобилите се паркирани на улицата, па пешаците се движат практично по самиот коловоз. Жителите од овој дел на Скопје се жалат на постојаната мешаница од возила и гласните свирежи

Проблемите на улицата Лениноваа не престануваат. Иако е најфреквентна улица во Дебар Маало речиси е непроодна и за автомобили и за пешаци. Терасите на кафулињата се протегаат до самиот крај на тротоарите, автомобилите се паркирани на улицата, па пешаците се движат практично по самиот коловоз. Жителите од овој дел на Скопје се жалат на постојаната мешаница од возила и гласните свирежи.
- Оваа состојба веќе не се издржува. Кога возите по оваа улица, како да сте во сцена од хорор-филм. Никој не гледа каде вози, какви сообраќајни знаци има и дали поминува пешак. Со страв се движиме по улицата, се вртиме и внимаваме да не не прегази некој. Па, згора на тоа, возачите се крајно дрски и како да не гледаат дека немаме каде да одиме, свират да се тргнеме. Нив не ги интересира дали има пешак пред нив, најбитно им е што побрзо да поминат и да најдат паркинг-место пред кафулето каде што ќе седнат на кафе. По тротоар не може да се оди од масите и столчињата на кафулињата, а по улица е ризично. Што поскоро треба да се најде решение за овој проблем, вели жител од зграда на улицата Лениноваа.

Надлежните од Општина Центар информираат дека имаат испратено барање до Градот улицата Ленинова" да стане еднонасочна. Од таму додаваат дека нарачале проект за нов сообраќаен режим, бидејќи по неа не е безбедно да се помине ниту пеш, ниту пак со возила, поради хаосот што е направен од паркираните коли на тротоарите и коловозот.
- Порачавме проект за еднонасочен сообраќај што планираме да зафаќа малку пошироко подрачје, но во прво време тоа да биде улицата "Ленинова". Планираме еднонасочен сообраќај да се воведе од булеварот Климент Охридски" до улицата Рузвелтова" и од Илинденска" до улицата Иво Рибар Лола". Со еднонасочниот сообраќај сакаме да овозможиме паркирање на коловозот, но не и на тротоарите, велат надлежните од Општина Центар.

Од Град Скопје велат во тек е изработка на ново сообраќајно решение за Дебар Маало, со кое би се решил проблемот на жителите.
- Град Скопје и Општина Центар изработија ново сообраќајно решение за Дебар Маало 1 и Дебар Маало 2. Со тоа треба да се воведе еднонасочен сообраќај што заедно со зонското паркирање ќе го растовари сообраќајот и ќе ја зголеми безбедноста на пешаците и возачите. Во моментов надлежните од СВР Скопје го разгледуваат решението и откако ќе дадат согласност, ќе започне неговата примена, објаснуваат од Град Скопје.

Од СВР Скопје појаснија дека пред неколку дена од страна на Град Скопје е доставено барање за промена на сообраќајниот режим за улицата "Ленинова", Од Градот бараат улицата да стане еднонасочна. Барањето се разгледува и се очекува набрзо да биде одговорено.

http://vecer.com.mk/?ItemID=B47AF51F2FD86544B84579D927261678