Вести

Вчера околу 2 часот наутро, по вторпат се одрони дел од ридот на Водно на градилиштето на фирмата "НЃ Инженеринг" на улицата Димо Хаџи Димов во Општина Кисела Вода. Во моментот кога се свлекол ридот, на градилиштето на фирмата немало никој. Од одронетата земја уништени се само неколку железни конструкции и друг градежен материјал. Работниците на градилиштето, кои со месеци го копаат ридот за да градат зграда, утрината кога отишле на работа го забележале свлекувањето. Тие велат дека за разлика од претходниот пат пред четири месеци, кога поради лошо поставените потпорни sидови на градилиштето се урнал дел од ридот на Водно, овој пат ридот не се одронил поради грешка во изведбата на градбата туку поради врнежите во изминатите денови.
"Нема грешка во градењето на зградата. Минатиот пат кога се случи одронувањето, немаше потпорни sидови, но ние веднаш после тоа ги изградивме. За среќа, ни минатиот пат ни сега нема повредени туку има само мала материјална штета", велат градежните работници.
Инспекција од Општина Кисела Вода вчера направија увид на градбата и утврди дека на градилиштето има низок потпрен sид кој не може да го спречи свлекувањето.
"Има потпрен sид, но тој е многу низок за да штити од одрони на земјиште. Градежната фирма под итно мора да изгради високи потпорни sидови. Ние сега го разгледуваме проектот согласно кој се гради и, согласно Законот за градење, ќе го санкционираме градителот за отстапките", изјави Тони Чупоски, портпарол на Општина Кисела Вода.
Од фирмата "НЃ Инженеринг" вчера беа недостапни за да објаснат зошто не ги изградиле потпорните sидови како што се предвидени во проектот, врз основа на кој добиле одобрение за градење.

http://www.vest.com.mk/default.asp?id=162695&idg=9&idb=2584&rubrika=Skopje

Градските власти планираат во оваа акција да ја вклучат и Детската клиника

Многу градинки и основни училишта имаат азбестни покриви

Градските власти ќе издвојат 300 илјади евра за менување на азбестните покриви во објектите во кои престојуваат деца од предучилишна возраст и од основното образование. Во оваа акција е предвидено да се отстрани азбестот и од Детската клиника во Клиничкиот центар. Освен средства од градскиот буџет, локалните власти најавуваат дека ќе бараат пари од фондовите на Европската Унија.Од Градот велат дека е во тек изработка на студија за влијанието на азбестот врз животната средина, која претходно треба да ја усвои Министерството за животна средина. Пред да почне отстранувањето на азбестот, од Градот објаснуваат дека ќе се формира работна група со стручни лица од повеќе институции.

- Град Скопје оваа година издвои 20 милиони денари за замена на азбестните покриви од објектите во кои престојуваат деца. Намерата на Градот е секоја година од градскиот буџет да се издвојува толкава сума пари, се' до завршувањето на проектот, но колку време ќе биде потребно целосно да се реши проблемот со азбестните покриви во Скопје не може да се прецизира, зашто станува збор за многу сложена постапка, која бара време, посебни услови за работа, специјално обучен кадар, услови за транспортирање и складирање на отпадот. Градот очекува во овој обемен проект да се вклучат и министерствата за животна средина, за транспорт и врски и за здравство - објаснуваат од Одделението за односи со јавноста. По усвојувањето на Студијата ќе следува јавна расправа, на која граѓаните ќе можат да ги кажат своите мислења.

Освен покривите, со азбестно-бетонски цевки е изграден и дел од водоводната мрежа во Скопје, односно 10 отсто од 1.000 километри водоводна мрежа. Од „Водовод“ со години тврдат дека тој не е опасен, но градоначалникот Костовски пред две години обелодени дека тоа ни оддалеку не е така. Според груби процени, потребни се 30 милиони евра за замена на водоводните цевки од азбестен материјал. Во европските држави во изминатите години имаше многу акции за отстранување на азбестот од покривите и од другите места на кои е употребен како градежен материјал, поради тоа што е штетен за здравјето на луѓето, односно тој е канцероген. Азбестот е наречен тивок убиец, бидејќи вдишувањето на неговите честички може да биде фатално за белите дробови и за грлото. Во Скопје, по земјотресот азбестот е премногу застапен во градежништвото, па освен во домовите, вакви покриви има и во многу градинки и основни училишта.

Јорданка Ивановска