Општина Штип по пат на електронско јавно наддавање продаде градежна парцела во населбата „Сењак“, на која е предвидено да се изгради трговски центар. Купувач е компанија со мешовит капитал од Црна Гора и од Косово, а според тврдењето на штипскиот градоначалник Зоран Алексов, тоа ќе биде најголемиот трговски центар во источна Македонија. Првиот човек на Штип во изјава за медиумите напоменува дека инвеститорот веќе ги уплатил финансиските средства во износ од околу 20 милиони денари на сметка на локалната самоуправа и во државниот буџет. Идниот трговски центар ќе биде изграден на површина од 14.000 метри квадратни, а во него ќе се вработат околу 50 лица. Изградбата на комерцијалниот објект треба да започне во 2013 година.

Населбата „Сењак“ во моментов претставува најатрактивно место за инвестирање во недвижности во Штип. Во неа веќе се гради станбено – деловниот комплекс на компанијата „Топ инвест“ на површина од 25.000 метри квадратни, додека штипската локална самоуправа во урбанистичките планови зацрта изградба на девет станбени згради од страна на приватни инвеститори, но и на објекти за индивидуално домување, кои треба да се реализираат по пат на продажба на неизградено државно градежно земјиште. Државата на оваа локација веќе подигна станбени згради со 91 социјален стан наменети за социјално загрозени лица.

Штип ќе го добие најголемиот Трговски центар во источна Македонија

Во штипската населба „Сењак“ ќе се гради најголемиот Трговски центар во источна Македонија. Градоначалникот на Општина Штип, Зоран Алексов вели дека продадено е градежното земјиште во населбата „Сењак“ по пат на јавна лицитација.