Кружен тек во Бутел

Градот Скопје денеска /21.06.2012 година/ ја почна изградбата на кружната крстосница меѓу улиците Боца Иванова и Александар Урдаревски, во општина Бутел. Почетокот на градежните работи го означија градоначалникот на Град Скопје, Коце Трајановски и градоначалникот на општина Бутел, Петре Латиновски.

- Градот Скопје ја продолжува градежната офанзива што ја почнавме пред месец и половина, во сите скопски општини. Денеска ја почнуваме изградбата на кружниот тек меѓу улиците Боца Иванова и Александар Урдаревски, при што улиците Александар Урдаревски и Цетинска ќе бидат физички одвоени со тротоар. Во овој проект Градот Скопје ќе вложи околу 23,3 милиони денари, а рокот на изведба е 100 дена. Во општината Бутел ќе биде изграден модерен кружен тек којшто ќе ги реши долгогодишните проблеми во сообраќајот во овој дел од градот и ќе го намали метежот. Упатувам апел до граѓаните да покажат разбирање додека траат градежните работи на кружниот тек во општината Бутел и да се придржуваат кон поставената патна сигнализација. Градот Скопје продолжува интензивно да работи на обнова на градските улици, во тек е реконструкцијата на улиците Радишанска и Козле, ги прошируваме улиците Првомајска, Свети Климент Охридски и Митрополит Теодосиј Гологанов, а наскоро ќе следуваат и нови значајни проекти.– рече денеска градоначалникот Коце Трајановски.

Градоначалникот на општина Бутел, Петре Латиновски, нагласи дека со овој проект се решава уште едно тесно сообраќајно грло во овој дел од градот коешто значително ќе ја зголеми безбедноста во сообраќајот.

Кружниот тек меѓу улиците Боца Иванова и Александар Урдаревски ќе се формира на ниво на постојниот коловоз и во него ќе има две коловозни ленти. Средишниот дел од кругот ќе се исполни со хумус и ќе се засади трева.

Улицата Александар Урдаревски по реконструкцијата ќе има две коловозни ленти, со ширина од по 3,5 метри, а од страните на коловозот ќе се изградат тротоари со променлива ширина и велосипедска патека од 2.5 метри. На оваа улица, се предвидени и две автобуски стојалишта, по едно од двете страни.

Улицата Боца Иванова ќе има две коловозни ленти од по 3,5 метри, тротоари од двете страни широки по 3 метри и зеленило.

По реконструкцијата, на кружната крстосница и на деловите од улиците што се спојуваат со неа ќе се нанесе нов асфалтен слој од Сплит Мастикс 16 (што овозможува заштита на асфалтот од оштетувања и го одложува формирањето траги од застанување на возилата).

Тротоарите на двете улици околу кружниот тек ќе бидат покриени со бекатон-плочки, на вкупна површина од 4 910 квадратни метри. На тротоарот меѓу улиците Александар Урдаревски и Цетинска ќе се постават метални столбови коишто ќе спречат преминување на возила преку тротоарот.

Изградбата на кружниот тек ќе се искористи за реконструкција и за заштита на постојната водоводна мрежа (Ф 300 и Ф 400), а на должина од 127 метри ќе се вгради нова водоводна мрежа со Ф 200. Проектот предвидува и изградба на атмосферска канализација во должина од 300 метри (со променлив профил од Ф 200 до Ф 500).

На изградба на кружната крстосница меѓу улиците Боца Иванова и Александар Урдаревски ќе работат екипите на градежната фирма „Бауер БГ“.

http://www.skopje.gov.mk/ShowAnnouncements.aspx?ItemID=5134&mid=482&tabId=1&tabindex=0