Етно село - Берово

Локацијата е во близината на нивниот семеен имот, на Кукута, каде се распослала Малешевијата со целата убавина, чии слики кај нив не избледиле и по толку години. Бетински велат дека носталгијата е таа која дава сила за да опстојуваш во туѓина со сознанието дека те чека некаде родниот крај.

-Детските спомени се најсилни, како дете сум бил тука и тоа иницираше. Сега сум одлучил да се вратиме тука, ако сме заработиле нешто тука да потрошиме, да пренесеме искуства, вели Дамјан Бетински, иселеник.

-Приврзани сме кон Берово и горди сме што сме Беровчани, вели Александра Бетинска, иселеник.

На месноста Кукута на површина од пет хектари, на 1400 метри надморска висина, за една година треба да никне Малешевско етно- село со 10 бунгалови, спортски терени, амфитеатар со етно- архитектура која ќе го носи малешевскиот печат и традиција.

Иселениците можат повеќе да вложуваат во Македонија. Бетински велат дека иако има многу богати Македонци во странство, тие не се заинтересирани дел од средствата кои ги заработиле да ги инвестираат во родната земја.

-Треба тие наши Македонци, посебно тие од Западна Македонија кои се многу богатии се бројно надмоќни да ги иницираме да се сетат на нашата Македонија и да инвестираат како нас, патриотизмот да биде застапен и кај нив, вели Дамјан Бетински, иселеник во Америка.

Минатата година овие иселеници инвестирале во пробивање на патот во должина од 4 километри. Очекуваат, освен моралната поддршка, исполнување на ветувањата од Општината за решавање на инфраструктурата на локалитетот кој претендира да прерасне во туристичка дестинација.