Јавно обвинителство и Финансиска полиција

И јавните обвинители и Финансиската полиција ќе се селат покрај Вардар

Во тек е конкурс за избор на идејно решение по кое ќе се гради зградата

Деспина Трајковска

Освен за уставните судии и службениците на Министерството за надворешни работи, државата ќе гради зграда на левиот брег на Вардар и за јавните обвинители и за Финансиската полиција. И покрај економската криза, сепак, Владата ветила дека до крајот на годинава, или на почетокот на идната ќе почне со изградба на објектот. Точната локација на зградата во која ќе се всели Јавното обвинителство и Управата за финансиска полиција надлежните се' уште не ја откриваат. Неофицијално, таа ќе се наоѓа во близина на објектот на Македонската опера и балет. 

Веќе е распишан и конкурс на кој се бара идејно-архитектонско решение по кое ќе се гради објектот. Каков лик ќе има новиот дом на јавните обвинители и Финансиската полиција ќе биде познато на почетокот на идниот месец.

Од Јавното обвинителство потврдуваат дека државата конечно ќе им излезе во пресрет на повеќегодишните барања за изградба на зграда за нивни потреби, со оглед на тоа дека обвинителите работат во несоодветни услови. Обвинителството повеќе години е кираџија во зградата на синдикалците, каде што соседи им се и уставните судии. За лошите и несоодветни услови за работа јавните обвинители неодамна го информирале и премиерот Никола Груевски, кој им ветил брзо решавање на проблемот. Ги прифатил нивните забелешки и барања и начелно им ветил дека изградбата на објектот за потребите на Обвинителството ќе почне најдоцна до пролет идната година, а за две години таа ќе биде вселива. Со оглед на тоа дека Управата за финансиска полиција е институција сродна на Јавното обвинителство, Владата одлучила во планираниот објект, покрај обвинителите, да се вселат и финансовите полицајци. 

Колку пари ќе бидат издвоени за овој проект се' уште не е познато. Од Владата и од владината Служба за општи и заеднички работи, преку која, всушност, ќе се реализира проектот, вчера не беа достапни да одговорат. Засега единствено се знае дека за авторите на идејното решение, по кое ќе се гради објектот и за изработувачите на трите труда планирани да се откупат, се издвоени околу 10.000 евра.