Споменик Карпалак - Прилеп

Дарко Штаргоски

Грандиозен споменик висок 40 метри, посветен на загинатите бранители на Карпалак, ќе биде поставен во Прилеп. Според идејното решение, споменикот треба да биде огромна челична конструкција на три столба, со три платформи. Првата ќе биде на висина од 25 метри, со површина од 325 квадратни метри, втората на 30 метри височина со површина од 410 квадратни метри и третата, која ќе претставува и своевидна панорама од каде ќе може да се гледа цела Пелагонија, ќе биде поставена на 40 метри висина и ќе има површина од 40 квадратни метри. Првите две платформи од споменикот ќе имаат комерцијална намена и на нив ќе бидат поставени ресторани, продавници за сувенири, галерии и други објекти од таков карактер. - Идејата беше да се изгради споменик кој освен првичната намена како културен објект ќе има и своја друга функција, со што ќе се зголеми неговата атрактивност. На најгорната платформа ќе бидат поставени и десет ласерски рефлектори кои ќе бидат насочени кон небото и кои ќе ги претставуваат десеттемина загина бранители на Карпалак, а ќе има поставено и телескопи од кои посетителите ќе може да ја набљудуваат целата околина. До платформите ќе се стигнува со транспарентен лифт кој ќе биде поставен во јадрото на споменикот - изјави Бранко Нешкоски, директор на Јавното претпријатие за просторно уредување. Споменикот ќе чини околу еден милион евра, од кои половината треба да ги обезбеди Владата, а половината ќе бидат пари од Општината и од донаторите. Според градоначалникот Марјан Ристески, за овој споменик се консултирани стручните лица од Општината и од Музејот во Прилеп, така што засега има две варијанти каде да биде поставен споменикот. Едната е во центарот на градот, а другата на Паркот на револуцијата, каде што почиваат загинатите бранители од НОБ. - Овој споменик ќе претставува уште еден значаен споменик за Прилеп и голема туристичка атракција. Ваков споменик нема на Балканот, со што Прилеп со уште една работа ќе биде познат во светот. Во зависност од средствата кои ќе успееме да ги добиеме, предвидено е едната платформа, наменета за ресторани, да се направи со механизам кој ќе ја врти за 360 степени по урнекот на ваквите градби во светските метрополи. Планирано е неговата изградба да почне до крајот на годината кога ќе завршат сите законски процедури за почнување на неговата градба - вели Ристески. За да се почне со изградбата на ова монументално дело, од Општината велат дека прво мора да се направи измена на Деталниот урбанистички план, а потоа да се распише тендер.