Проблем со летните тераси

БОГДАНОВИЌ НАМЕСТО ШИЛЕГОВ ЌЕ ДАВА ДОЗВОЛИ ЗА ПОСТАВУВАЊЕ ЛЕТНИ ТЕРАСИ ВО ЦЕНТАР

Општина Центар отсега ќе издава одобренија за поставување летни тераси пред кафулињата и кафеаните, наместо Град Скопје. Општината и Градот денес го потпиша договорот за преземање на овластувањата и обврските за издавање одобренија за поставување урбана опрема на територијата на Општина Центар.

Досега одобренијата за летните тераси ги издаваше Град Скопје, а Општината потоа требаше да контролира, казнува и урива.

„Во јуни 2009 година Општина Центар потпишала договор за отстапување на ингеренциите на Град Скопје да врши овластување и издавање дозволи за поставување урбана опрема во Дебар Маало, Парк и Мал Ринг. По одржаните состаноци со Град Скопје, заеднички одлучивме ингеренциите да се вратат на Општина Центар, бидејќи за истите општината врши контрола и инспекциски надзор“, изјави градоначалникот Саша Богдановиќ.

Општина Центар има подготвено сопствена програма и план за начинот на кој ќе биде поставена урбаната опрема.

„Ова е голем успех за Општина Центар, бидејќи конечно ингеренции што претходно биле дадени или одземени, сега се враќаат под контрола на Општина Центар, а во наредниот период продолжуваме да работиме на програми и планови за преземање на урбаната опрема и на други локации, согласно останатите детални урбанистички планови во Општина Центар“, изјави Богдановиќ.

Од Општината велат дека овластен градежен инспектор по службена должност направил увид во два објектa, каде што се утвдени неправилности во работењето, согласно Законот за градење. Секторот за инспекциски надзор издал Решение за отстранување за инвеститорот Кафе бар-Макка на булеварот Климент Охридски бб и за инвеститорот Ди Лума Груп Дооел-Скопје на улица Ленинова бр.38. Ако во наредниот период нелегалните градби не бидат отстранети, Општина Центар ќе пристапи кон присилно административно извршување.

Во буџетот на Општина Центар за 2021 планирани се 12 милиони денари за рушење на бесправно изградени објекти во Центар.

https://sdk.mk/index.php/dopisna-mrezha/bogdanovik-namesto-shilegov-ke-dava-dozvoli-za-postavuvane-letni-terasi-vo-tsentar/

КАФЕАНЏИИТЕ НА КЕЈОТ ВО СКОПЈЕ НА ДИВО ПОСТАВИЈА МАСИ НИЗ ШЕТАЛИШТЕТО, МАЛКУ ИМ Е ЗАЗЕМЕНИОТ ЈАВЕН ПРОСТОР НА КОЈ ТЕРАСИТЕ ГИ ПРЕТВОРИЈА ВО ЗАТВОРЕНИ ПУШАЛНИ





Кафеанџиите од кејот 13 Ноември во Скопје ги распослаа масите и столиците на шеталиштето, иако тоа не им е дозволено. Откако кејот беше реновиран пред три години во мандатот на ексградоначалникот Петре Шилегов, кафеанџиите добија дозвола да имаат тераси само пред објектите. Беше точно обележано до каде можат да се простираат и добија плус 3,5 метри од јавниот простор. Но, сега газдите не се задоволни од добиениот простор и сакаат да имаат маси и столици низ плочникот, па на диво ги поставија во договорена акција на сите угостители. Масите се поставени помеѓу клупите за пешаци со што всушност им се блокира пристапот на сите пешаци што сакаат да седнат да одморат, а притоа да не мора да седат во кафеана.

Кафеанџиите кога го добија просторот за тераси пред објектите го затворија со стакло, па наместо тераси станаа затворени објекти за да може да се пуши во нив. Сега сакаат да имаат маси и на отворено бидејќи терасите им се заградени, а гостите сакаат да седат надвор.

Кога се реновираше кејот Шилегов кажа дека низ плочникот нема да има маси и тој ќе биде слободен за прошетки. Кафеанџиите не беа задоволни од ваквата одлука, но ја почитуваа до пред една година. Лани летото исто на диво ги извадија масите, но по пишувањето на медиумите и реакцијата од Град Скопје беа отстранети. Сега вторпат пробуваат на диво да го заземат шеталиштето.

До реновирањето во 2021 на кејот владееше хаос, целиот беше блокиран од тераси кои беа заградени и претворени во пушални и објекти, не само пред влезот, туку и среде кејот. Насекаде имаше паркирано коли, искршен беше плочникот, а клупите демолирани. САКАМДАКАЖАМ.МК со години пишуваше за овој проблем, по што во време на Шилегов кејот се среди и сè досега функционираше како шеталиште без коли.

Реконструкцијата на кејот, при која беа поставени нов плочник, клупи и ново осветлување, чинеше 1,5 милиони евра.

https://sdk.mk/index.php/dopisna-mrezha/kafeandhiite-na-kejot-vo-skopje-na-divo-postavija-masi-niz-shetalishteto-malku-im-e-zazemeniot-javen-prostor-na-koj-terasite-gi-pretvorija-vo-zatvoreni-pushalni/