По сто и педесет години откако во Велес е изградена последната црква, соборниот храм "Свети Великомаченик Пантелејмон", од неимарот и градител Андреја Дамјанов, велешани лани започнаа да градат нов сакрален објект во центарот на градот. Црквата "Свети Кирил и Методиј" што Македонската православна црква ја гради со помош на Општината и граѓаните веќе го привлекува погледот со автентичната архитектура. Објектот го градат врвни македонски градители од Пустец, Албанија. Ним им се придружи уште еден врвен уметник, кој е копаничар. Велешанецот Љубомир Бисин е исправен пред најголемиот предизвик во својата уметничка кариера - изработка на иконостасот за новата црква.
"Кога човек мечтае за поголеми работи во животот тие се исполнуваат ако си подготвен да се носиш со мечтаењето. Во мене тлееше желба јас да изработам иконостас и да ја отсликам духовната големина и убавина на велешкиот и македонски бисер на сакралната уметност 'Свети Великомаченик Пантелејмон'. Бог ги услиша моите молби и се случи во мојот роден град да добијам шанса и да изработам иконостас во црква која сите велешани ја гледаат како секојдневно е се повисока и поголема и се наоѓа во центарот на градот, а ќе го носи името на сесловенските просветители 'Свети Кирил и Методиј'", вели Љубомир Бисин.
Наредните три години, секојдневно, во работилницата овој копаничар и неговиот помошник Игор Лесков ќе ги изработуваат деловите од иконостасот чии димензии изнесуваат 9,80 метри во ширина и 7,70 метри во висина. Бисин со длетото и чеканот в раце има задача да ја изработи резбата од оревово дрво на површина од точно 41 м2. За да биде што потраен иконостасот, избрано е најквалитетно парено оревово дрво. Во долната зона, каде што се наоѓаат постаментот со големите поли или китабиња, ќе се користи плитка резба со флорални мотиви. Во подзоната на иконостасот, место на кое вообичаено се сместени малите поли, ќе се користат мотиви од Стариот завет на левата страна на иконостасот и мотиви од Новиот завет на десната страна. Над нив се наоѓа галеријата на престолни икони во чија централна позиција се сместени царските двери или влезот во олтарот. Средниот дел на олтарот, кој завршува со архитрав, предвидено е да се изработи во скрозирана резба со традиционални македонски мотиви во кои доминира лозата. Во овој дел од иконостасот се наоѓаат и празничните икони. Архитравна греда, изработена во плитка резба, ќе ги дели празничните од апостолските икони со триптихот. Ламји и богословки изработени во резба ќе ја красат акротеријата со крстот и распетието, на самиот врв, најгоре на иконостасот.
"При изработката ќе ги користам традиционалните мотиви на македонската резба. Тука, пред се, мислам на Охридската и Дебарската школа, кои преферираат мотиви од флората и фауната - цветови како див трендафил, ружа, лале, нарцис. Според пишани документи, ермении и книги на наши постари мајстори, исто така, може да се констатира дека тие многу често употребувале и животни. Птиците, елените, ламјите, но и бројни барокни елементи се дел од копаничарската традиција на македонскиот простор", вели Бисин.
Изготовени се цртежите за долната и средната зона на иконостасот. Според нив се изработени влезните врати на олтарот на иконостасот. Скиците за иконостасот, кој не е праволиниски, туку каскаден и во ширина и во висина со повеќе прекршувања, се дело на архитектот Тања Паскали од Охрид.
"Изработката на иконостасот комплетно ќе биде завршена за околу три години. Во тоа време е планирано и монтирањето на металната конструкција на која ќе биде поставено делото, а дотогаш ќе ја завршам и изработката на владичиниот трон", вели Бисин.
Овој велешки копаничар досега имал две самостојни изложби, а изработил многу икони и над 200 копаници што веќе се продадени на љубители на македонската резба во земјата и во странство. Негова изработка е и мебелот во Ликовниот салон во Велес. Мечтае да оформи резбарска школа и Велес да стане еден од центрите на македонската резбарска традиција. Во работилница на Бисин од неодамна го печат занаетот две млади момчиња од градот.
Убавка Јаневска

Завршија градежните работи за изградбата на Св. Кирил и Методиј

Треба ли на камбанаријата од новата црква да има часовник

Завршуваат градежните работи на камбанаријата од црквата Св. Кирил и Методиј. Дел од посетителите на ТРМР побараа да се претстави идејата на неа да се постави часовник, кој ќе покажува точно време. 

 Ова бидјеќи истата е лоцирана на најферкефентниот дел до градот и тука секогаш има луѓе. Часовникот би бил добредојден за сите нив. Оваа идеја не е ерес, бидејќи и на други камбанарии на МПЦ има часовници. На пример пред Соборниот храм во ценатрот на Скопје. Доколу ја поддржувате  идејата, кликнете на срцето. И онака во градот немаме часовник со точно време. Постојниот пред Пошта е  со време кое  никогаш не е точно.

Камбанаријата е висока 25 метри и ќе има пет ѕвона чиј звук ќе се слуша до Градско, Чашка, Ветерско и Лозово најави владиката Агатангел, митрополит на Повардарската епархија, на осветувањето на нејзините темели. Тој очекува дека ѕвоната ќе се огласуваат за убави работи свадби, крштевки, венчавки.

Новата црква во Велес нема да се отвори ниту годинава!

Среда, 04 Јануари 2012 15:02

Црквата во центарот на градот и оваа година нема да го доживее отворањето, потврдуваат од Повардарската епархија. Од таму велат дека и во новата година ќе продолжат да градат храмови како и досега, а ќе се посветат и на едукација на верниците.

 Идејата Велес и велешко да станат Македонската Света гора полека станува реалност - вели владиката повардарски Агатангел. Изминатата година се граделе многу храмови во околината, но најголемиот нема да биде готов ниту оваа година, велат од Повардарската епархија. Црквата Свети Ќирил и Методиј која е лоцирана до младинскиот парк, верниците нема да може да ја посетуваат уште подолго време :

-"Црквата како градежен објект со камбанаријата е завршена, но сега работиме на фрескоживописот и на иконите и се додека ова не го завршиме не би сакал да ја отвориме. Ние можеме и сега да ја отвориме, но потоа многу тешко ќе биде со фрескоживописувањето и затока ќе почекаме усхте една година и ако даде Бог во 2013 год ќе ја пуштиме во употреба"

Сепак од епархијата се среќни што годинава камбанаријата ги доби првите ѕвона кои секојдневно го пренесуваат духовниот благослов. На почетокот на годинава сумираа она што го сториле изминатата. Реновирана е и пуштена црквата Света Богородица во Велес, осветена е и Света Петка на патот кон Бабуна, започна да се гради болничката црква, а се работело и во Кавадарци и Неготино. Сепак, според владиката, ова е време на духовна криза :

- "Согледувајќи дека се наоѓаме во време на духовна криза, Повардарската епархија и оваа година сериозно се посвети на мисионерка и просветителска дејност, задржувајки го континуитетот на своите редови и периодични весници, списанија и книги кои со својата извонредна духовна содржина, веруваме дека ќе придонесат за правилно воспитување на Македонските православни христијани"

СЕ ЖИВОПИСУВА ЦРKВАТА „СВЕТИ KИРИЛ И МЕТОДИЈ“ ВО ВЕЛЕС

Од мајсторите зависи отворањето на новиот храм

Предвиденото осветување на новата црква „Свети Kирил и Методиј“ во Велес, на 24 мај годинава, е неизвесно иако сите градежни работи се завршени и таа може да ги прима верниците. Владиката Агатангел сака тоа да се случи годинава, но дали ќе биде така, зависи од мајсторите, тајфата на Ангел, која ја живописува. Тие ја цртаа и црквата „Света Богородица“ во Велес. 

- Се надеваме дека тоа ќе се случи, но зависи од мајсторите и од парите. Мајсторите што ги фрескоживописуваат ѕидовите имаат уште многу работа. Досега имаат нацртано 1.000 квадратни метри од 1.600, колку што има во црквата и плус уште 400 од крштелницата. Ако тие завршат, црквата ќе биде отворена. Готов е иконостасот, иконите, се работи на дворот. Ѕвоната и камбанариите се исто завршени. Можевме да ја отвориме од пред две години, но сметам дека не е во ред верниците да доаѓаат на празни ѕидови. Потоа луѓето ќе им пречеа на мајсторите да работат на скелиња. Вака кога ќе биде готова, ќе ја осветиме, да биде радост за цел град. Сакам црквата да ја предадеме кога ќе биде готова – изјави владиката Агатангел, митрополит на Повардарската епархија. 

Храмот почна да се гради на 1 јуни 2006 година. Црквата ќе служи за венчавки, крштевања, но не и за погреби. Тој потсети дека црквата на „Свети Дамјан и Kозма“ во дворот на болницата е готова, но не можат да најдат мајстори за живописување оти тие барале многу за цртање. Слична е состојбата и со црквата „Света Петка“ во Kавадарци, каде што не можеле за црквата да бидат најдени сликари. (П.П.)